Адам өмірінің ең қызықты, тәтті сезімдерге толы кезеңі – студенттік шақ. Білім көкжиегін кеңейтіп, шаршау мен уайымды білмей, ізденумен, үйренумен, танысумен, табысумен өтетін, жаныңа жақын дос тауып, құрбы-құрдаспен күліп-ойнап өтетін алаңсыз шақ.
Зарина КӘП,
«Семей таңы»
Студенттің әр күні естен кетпейтін естеліктерге толы болғанымен, ерекше романтикамен өтетін күндер де болады. Соның бірі — 17 қараша — Халықаралық студенттер күні. Осы мерекеге орай, Семей Қалалық Мәдениет сарайында жыл сайынғы дәстүр бойынша Student`s life кеші өтті. Салтанатты шараға студенттер көп жиналды. Әсіресе арман жетегінде үлкен қалаға келіп, қалаған оқу орнына түсіп, студенттік өмірге енді ғана үйрене бастаған жастар жағы көп. Биылғы мерекелік шара жылдағыға қарағанда өзгеше форматта өтті. Студенттер түрлі номинациялар бойынша марапатталып, естелік сыйлықтар тапсырылды.
Ең алғашқы марапат — «Студенттер үшін үздік тамақтану орны» аталымын «Дәмді» кафесі иеленді. «Лайм бар» кафесіне «Үздік жарнама» номинациясы тапсырылды. Ал студенттер — Ринат Бақытханов «Үздік мобилограф», Есхат Жарқын «Көрінбей кеттің көп болды», Абай Мейрамбеков «Жыл жаңалығы», Елнұр Казисов «Үздік тиктокер», Қуантқан Қуанышханұлы «Үздік видеоқаралым» аталымын жеңіп алды.
— Бүгінгі мерекелік салтанаттың мақсаты, Халықаралық студенттер мерекесіне орай, әр салада білім алып жүрген жастарды бір ортаға тоғыстыру болған. Мақсатымыз орындалған сияқты. Студенттер мерекесін биыл 3 жыл ұйымдастырып отырмыз. Алайда биыл өзгеріс енгізіп, көңілдірек болсын деп, қызықты аталымдар табыстауды жөн көрдік. Жастардың көңілінен шықты деген ойдамын,- дейді шараны ұйымдастырған Семей қаласы Жастар ресурстық орталығы директорының міндетін атқарушы Талант Қыдырмоллаев.
Салтанатты жиын концерттік бағдарламамен жалғасып, өнерлі жастар әдемі әндерімен, әсем билерімен көрерменді тәнті етті.
Мерекелік кеш соңында сондай-ақ Жастар орталығының ұйымдастыруымен «Абай ақпарат» ақпараттық порталында өткен сауалнама нәтижесі бойынша жеңімпаз деп танылған студенттерге дипломдар табысталды.
