Өткен жұма 18 қараша күні Абай облыстық мәслихатының кезектен тыс Х сессиясы өтті. Сессияға облыс әкімінің орынбасары Айдын Кәрімов, мәслихат хатшысы Қуаныш Сүлейменов, депутаттар және басқарма басшылары қатысты.
Сессия барысында облыстық мәслихат депутаттары Айнаш Әменова және Айбек Нұғымаров Абай ауданы Құндызды ауылындағы Шәкір Әбенов атындағы орта мектептің ауласын қоршау және асханасын жөндеу туралы бастама көтерді.
— Мектеп ауласы – оқу мекемесінің көрнекті келбеті болып саналады. Мектепке алғаш келген адамның мектеп ауласына қарап ойы қалыптасатыны анық. Ауылдарды аралау барысында мектеп аулаларын абаттандыруға қаржы бөлінбейтінін байқадық. Шәкір Әбенов атындағы орта мектеп 1987 жылы бой көтерген. Білім ордасында 40 педагог 212 оқушыға білім беруде. Мектеп алды даярлық тобында 22 оқушы, шағын орталықта 52 бала тәрбиеленіп отыр. 2013 жылдан бастап облыстық бюджеттен мектептің терезесін, спорт залының төбесін, акт залының шатырын ауыстыруға, ішкі жөндеуге қаражат бөлініп, жөндеу жұмыстары жүргізілген. Мектеп ауласының жалпы аумағы 505 метрді құрап отыр. Ауланы қоршауға 17 млн. 831 мың теңгені қажет екен. Әдемі келбеттен қарағанда, ең алдымен қоршау оқушылардың қауіпсіздігі үшін жасалуы қажет деп санаймын,- деген Айнаш Әменова мектептің асханасы да ағымдағы жөндеуді қажет ететінін тілге тиек етіп, облыстық бюджттен 5 млн. теңге қаражат керек екенін жеткізді. «Мектеп бюджеттік өтінімді дайындап, облыстық білім басқармасына жолдайтын болады. Жалпы соммасы облыстық бюджттен 22 млн. теңге қаражат бөлуді ұсынып отырмыз»,- деді Айнаш Әменова.
Абай облысы әкімінің бірінші орынбасары Айдын Кәрімов бұл ұсынысты қолдайтынын білдірді.
