Өткен жұма, 18 қараша күні Абай облыстық мәслихатының кезектен тыс, Х сессиясы өтті. Сессияға облыс әкімінің орынбасары Айдын Кәрімов, мәслихат хатшысы Қуаныш Сүлейменов, депутаттар және басқарма басшылары қатысты.
Жадыра ТӨЛЕГЕНҚЫЗЫ,
«Семей таңы»
Сессия отырысында Абай облысының, қаланың, ауданның Құрметті азаматы атағын беру туралы ережені бекіту, Абай облысы әкімдігі жанындағы құқық бұзушылықтардың алдын алу, сыбайлас жемқорлыққа қарсы іс-қимыл мәселелері жөніндегі ведомствоаралық комиссиялардың, жер комиссиясының және нашақорлықтың алдын алу, есірткі қылмысына қарсы іс-қимыл жөніндегі штабтың құрамын бекіту, жегілікті атқарушы және өкілді орган қызметкерлеріне тұрғын үйді жалға алу бойынша шығыстарды өтеуге арналған төлемдерді қамтамасыз ету, Абай облыстық мәслихатының 2022 жылғы 6 қыркүйектегі 2022-2024 жылдарға арналған облыстық бюджет туралы шешіміне өзгерістер енгізу туралы, Абай облысы аумағындағы жасыл желекті күтіп ұстау, қалалар мен елді мекендер аумағын абаттандыру, Абай облысы елді мекендерінде ауыл шаруашылығы жануарларын ұстау қағидаларын бекіту, Абай облысы мәслихат аппаратының «Б» корпусы мемлекеттік әкімшілік қызметкерлерінің қызметін бағалаудың әдістемесін, Абай облысының Құрмет грамотасымен марапаттау туралы ережені, Абай облысы әкімдігі жанындағы жер комиссиясы туралы ережені бекіту туралы сұрақтар қаралды.
Күн тәртібіндегі алғашқы бес сұрақ бойынша Абай облысының әкімдігі аппаратының басшысы Жасұлан Сәрсебаев сөз алып, шешім жобасын депутаттарға ұсынды.
Абай облысының экономика және бюджетті жоспарлау басқармасының басшысы Роза Құдайбергенова мәслихаттың 2022-2024 жылдарға арналған облыстық бюджет туралы шешіміне енгізілетін өзгерістер туралы баяндап, шешім жобасы депутаттардың дауысына салынды.
— Республикалық бюджет есебінен мүгедек адамдардың құқықтарын қамтамасыз ету және өмір сүру сапасын жақсартуға 13,4 млн теңге; ішкі істер органдарының қосымша штат санын ұстауға және материалдық-техникалық базасын жақсартуға 52 млн 258 мың теңге, мемлекеттік орта білім беру ұйымдарында нормативтік оқу жүктемесінің төмендеуіне байланысты 752 млн 800 мың теңге, ауылдық елді мекендерде және шағын қалаларда микронесие беруге 1 млрд теңге көлемінде қаршы бөлінеді,- деді Р.Құдайбергенова.
Абай облысы аумағындағы жасыл желекті күтіп ұстау, қалалары мен елді мекендері аумағын абаттандыру туралы ережемен ТҮКШ басқармасы басшысы Жандос Қайырханов таныстырдаы.
— Жасыл екпелерді күтіп-ұстау қағидаларында жасыл екпелерді күтіп-ұстау және қорғау тәртібі, жасыл екпелерді есепке алу жөніндегі құжаттарды жүргізу тәртібі жазылған, оларды қорғау шаралары қарастырылған. Сонымен қатар өңірдің елді мекендерін көгалдандыру жұмыстары жоспарланған. Ағаштарды отырғызу тәртібі жазылған. Абаттандыру қағидалары Абай облысының қалалары мен елді мекендерінің аумақтарын абаттандыру тәртібін айқындайды. Оның ішінде Абай облысының қалалары мен аудандарында тазалық пен тәртіпті қамтамасыз ету, қалдықтарды жинау және шығару, көшелер мен шағын аудандарды абаттандыру, ғимараттар мен құрылыстардың қасбеттерін күтіп ұстау, іргелес аумақты абаттандыру бойынша іс-шараларды ұйымдастыру бар. Ережені бұзғаны үшін жауапкершілік қарастырылған, — деді Жандос Қайырханов.
Абай облысы елді мекендерінде ауыл шаруашылығы жануарларын ұстау қағидалары туралы ережемен Абай облысы ветеринария басқармасы басшысының міндетін атқарушы Қуат Жүнісов таныстырды.
Халық қалаулылары сессияда қаралған барлық шешім жобаларын бір ауыздан қолдады.
Сессия барысында облыстық мәслихат депутаттары Айнаш Әменова және Айбек Нұғымаров Абай ауданы Құндызды ауылындағы Шәкір Әбенов атындағы орта мектептің ауласын қоршау және асханасын жөндеу туралы ұсыныс айты.
— Мектепке алғаш келген адамның мектеп ауласына қарап ойы қалыптасатыны анық. Ауылдарды аралау барысында мектеп аулаларын абаттандыруға қаржы бөлінбейтінін байқадық. Шәкір Әбенов атындағы орта мектеп 1987 жылы бой көтерген. Білім ордасында 40 педагог 212 оқушыға білім беруде. Мекте алды даярлық тобында 22 оқушы, шағын орталықта 52 бала тәрбиеленіп отыр. 2013 жылдан бастап облыстық бюджеттен мектептің терезесін, спорт залының төбесін, акт залының шатырын ауыстыруға, ішкі жөндеуге қаражат бөлініп, тиісті жұмыстар жүргізілген. Мектеп ауласының жалпы аумағы 505 метрді құрап отыр. Ауланы қоршауға 17 млн 831 мың теңге қажет екен. Әдемі келбеттен бұрын, ең алдымен, оқушылардың қауіпсіздігі үшін қоршау жасалуы қажет деп санаймын,- деген Айнаш Әменова мектептің асханасы да ағымдағы жөндеуді қажет ететінін жеткізіп, облыстық бюджттен 5 млн теңге қаражат керек екенін жеткізді. «Мектеп бюджеттік өтінімді дайындап, облыстық білім басқармасына жолдайтын болады. Жалпы сомасы облыстық бюджттен 22 млн. теңге қаражат бөлуді ұсынып отырмыз,- деді Айнаш Әменова. Абай облысы әкімінің бірінші орынбасары Айдын Кәрімов бұл ұсынысты қолдайтынын білдірді.
Сессия соңында әкім орынбасары облыстық мәслихат депутаты Мамырбек Қаралиевке «Шапағат» медалін табыстады.