Семейде жер учаскесін алу үшін кезекте 28 991 адам тұр.
Бұл туралы бүгін өңірлік коммуникациялар қызметінде өткен брифингте Абай облысының ауыл шаруашылығы және жер қатынастары басқармасының басшысы Анзор Абаев айтты.
— Бекітілген Бас жоспарға сәйкес Семей бойынша жеке тұрғын үй құрылысы үшін жалпы ауданы 4 574,2 гектар болатын 12 тұрғын үй алабы қарастырылған. Инженерлік желілермен қамтамасыз етілуіне және инфрақұралымына қарай тұрғын үй алаптарындағы құрылыс жұмыстары 3 кезеңге бөлінген, — деді ол.
Анзор Абаевтың айтуынша, бірінші кезеңге — ИКҚ-мен қамтамасыз етілген құрылыс аймақтары кіріп отыр (2 тұрғын массиві — «Ұшақтар» және «Комсомол»).
— Екінші кезеңге — ИКҚ қамтамасыз ету үшін ең аз қаражат бөлуді талап ететін құрылыс аймақтары («Ақсай» тұрғын массиві), үшінші кезеңге — ИКҚ қамтамасыз ету үшін ауқымды қаражатты талап ететін құрылыс аймақтары (9 тұрғын массиві) енгізілген, — деді басқарма басшысы.
