Ұлттық ұлан жауынгерлері жүкті әйелді аман алып қалды, деп хабарлайды ҚазАқпарат.
22 қараша күні сағат 9:30 шамасында Семей қаласындағы Би-Боранбай көшесі бойында келе жатқан жүкті әйел кенет есінен танып, құлап қалады.
Тәуліктік кезекшіліктен шығып, үйіне қайтып бара жатқан 5511 әскери бөлімінің үш әскери қызметкері құлап жатқан әйелді байқайды.
Ұландықтар дереу көлігін тоқтатып, 103 шұғыл нөміріне хабарласқан.
Сосын уақыт жоғалтпай талып жатқан әйелге алғашқы медициналық көмек беруге кіріседі.
Зардап шегушіге есін жиюға көмектесіп жатқанда оның «идиопатиялық эпилепсия» диагнозымен есепте тұрғаны белгілі болады.
Жедел жәрдем келе сала әйелді бірден қалалық перинаталды орталыққа алып кетеді.
Қазіргі таңда әйелдің денсаулығы бірқалыпты.
