Кеше, 24 қараша күні, Семей қалалық әкімдігінде қалалық мәслихаттың кезектен тыс, 36 сессиясы өтті. Сессияға қала әкімінің міндетін атқарушы Данияр Шәкәрімов, қалалық мәслихат хатшысы Бейсенбек Ақжалов, Семей қалалық Қоғамдық кеңесінің төрағасы Шаған Жұмақсанов және дербес бөлім басшылары қатысты.
Жадыра ТӨЛЕГЕНҚЫЗЫ,
«Семей таңы»
Күн тәртібінде жеті мәселе қаралды. Семей қаласы мәслихатының 2021 жылғы 24 желтоқсанындағы «Семей қаласының 2022-2024 жылдарға арналған бюджеті туралы» шешіміне енгізілген өзгерістер туралы қалалық экономика және қаржы бөлімі басшысының міндетін атқарушы Мейіржан Сахариев баяндады. Мейіржан Сахариевтің айтуынша, қоғамдық көлік және автомобиль жолдары бөліміне облыстық бюджеттен бөлінген қаржы 25 млн теңгеге артқан. Аз қамтылған отбасы балаларына жеңілдікпен жол жүру ақысына 162 млн теңге бөлінсе, көп қабатты үйлер тұрғызуға бөлінген қаржы 215 млн теңгеге, магистральды-инженерлік желілерді тартуға бөлінген сома 94 млн теңгеге өскен. Елді мекендерді абаттандыруға бөлінген қаржы 138 миллион теңгеге, көшелерін жарықтандыруға бөлінген қаржы 77 миллион теңгеге көбейеді.
Сессия барысында сонымен қатар төтенше жағдайлардың алдын алу және жою жөніндегі, қала әкімі жанындағы кәмелетке толмағандардың істері және олардың құқықтарын қорғау жөніндегі, қала әкімі жанындағы құқық бұзушылық профилактикасы жөніндегі ведомствоаралық комиссияларының дербес құрамы бекітіліп, «Семей қаласы мәслихатының хатшысын сайлау туралы» Семей қаласы мәслихатының 2016 жылғы 25 наурыздағы шешіміне, 2022 жылғы 9 қыркүйектегі «Абай облысы Семей қаласы мәслихатының регламентін бекіту туралы» шешіміне, «Абай облысы Семей қаласыың мәслихат аппараты» мемлекеттік мекемесін қайта атау және Ережесін бекіту туралы» шешіміне өзгерістер енгізілді.
