Өткен жексенбі, 27 қараша күні «Арена» мәдени — спорт кешенінде Семей қаласының дене шынықтыру және спорт бөлімі және “Бүкілқазақстандық кекушинкай каратэ ұйымы” ҚБ филиалының ұйымдастыруымен, Балалар жылына орай, кекушинкай каратэден Семей қаласы әкімінің кубогына арналған ашық турнир өтті.
Жадыра ТӨЛЕГЕНҚЫЗЫ,
«Семей таңы»
Турнирге Астана, Шымкент, Алматы, Көкшетау, Петропавл, Өскемен, Қостанай, Қарағанды, Ақтау, Семей қалаларынан, Павлодар, Жетісу облыстарынан 700-ден астам спортшы қатысты.
Турнирдің ашылу салтанатында Семей қаласы дене шынықтыру және спорт бөлімі басшысының міндетін атқарушы Бауыржан Дюсенбаев және «Бүкілқазақстандық кекушинкай каратэ ұйымы» ҚБ президенті Таджимурат Найзабеков сөз сөйледі.
— Ардақты ағайын! Қымбатты спортсүйер қауым! Бүгін біз кекушинкай каратэден әкім кубогына арналған турнирдің ашылу салтанатының куәгері болып отырмыз. Ең алдымен, спорт шеберлеріне, құт қонған қасиетті өлкеге табан тіреген құрметті қонақтарымызға Абай облысы Семей қаласына қош келдіңіздер дегім келеді! Спорт — ел мерейін асырып, абыройын асқақ етер сала. Саламатты өмір салты – рухтың күштілігі, ұлт денсаулығының берік кепілі. Ұлылар мекенінің төрін дүбірге толтырып, еліміздің әр өңірінен бақ сынауға келген барша турнирге қатысушыларға сәттілік тілеймін! Қайсарлық, өршілдік, жоғары спорттық шеберлік таныта отырып, әрдайым жеңіс тұғырынан көріне беріңіздер! Байрақты бәсекелерде топ жарып жүрген спортшыларға әр кез құрметіміз мол. Жоғары шеберліктеріңіз, мақсатқа талпынудағы ерік-күштеріңіз бен қайрат-жігерлеріңіз — жарқын жеңістердің көрсеткіші. Сіздерге денсаулық, бақыт және спорттық сайыстарда табыстар тілеймін. Жеңісті әрі жемісті күндеріңіз көп болсын!- деді Семей қаласының дене шынықтыру және спорт бөлімі басшысының міндетін аткарушы Бауыржан Тұрарбекұлы.
Жарыс соңында жеңімпаздар мен жүлдегерлер Семей қаласы әкімінің кубогымен, грамоталармен және медальдармен марапатталды.
