Semeytany.kz — Түркістан қаласында Мемлекет басшысының тапсырмасымен халықаралық талаптарға сай салынған бірегей есу арнасы пайдалануға берілді. Нысан Халықаралық каноэ федерациясы (ICF) және Халықаралық академиялық есу федерациясы (FISA) стандарттарына толық сәйкес келеді, деп хабарлады ҚР Туризм және спорт министрлігі.
Ашылу салтанатына Қазақстанға арнайы келген ICF президенті Томас Кониеццко қатысып, спорт кешеніне жоғары баға берді. Туризм және спорт министрі Ербол Мырзабосыновтың айтуынша, бұл нысан халықаралық деңгейдегі жарыстарды қабылдауға мүмкіндік береді және тек кәсіби спортшыларға ғана емес, қала тұрғындарына да ашық болады. Кешен аумағында волейбол, футбол, баскетбол алаңдары мен қалалық жағажай қарастырылған.
Жалпы аумағы 100 гектарды құрайтын, ұзындығы шамамен 2,5 шақырым болатын есу арнасы академиялық есу, байдарка мен каноэ бойынша Әлем және Азия кубоктері секілді турнирлерді өткізуге әрі тұрақты жаттығуға лайықталған. Арна суы қаладағы суармалы жүйеге қосылып, жасыл белдеуді суаруға да пайдаланылады. Инфрақұрылым құрамына ұзындығы 1 шақырымдық қалалық жағажай, қонақ үй және көрермендерге арналған трибуна кіреді.
Қазіргі таңда еліміздің 12 өңірінде академиялық есу, байдарка мен каноэде есу және есу слаломы дамып келеді: бұл спорт түрлерімен жүйелі түрде 6 131 адам айналысады, олармен 174 жаттықтырушы жұмыс істейді. Академиялық есу – медаль жиынтығы көп спорт: Олимпиадада 14 жиынтық, әлем чемпионаттарында 20-дан аса бағдарлама бар. Бұл бір ел спортшыларының бірнеше санатта бір мезетте бақ сынап, нәтижені еселеуіне жол ашады. Жоба Түркістанның спорттық, экологиялық және туристік әлеуетін арттырып, ұлттық құрамалар мен жас спортшыларды даярлайтын басты орталықтардың біріне айналмақ. Биыл жыл соңына дейін Астанадағы Ұлттық спорт университетін іске қосу да жоспарланып отыр.
