Өткен сенбі күні Қалалық Мәдениет сарайында ауыл шаруашылығы және қайта өңдеу өнеркәсібі қызметкерлерінің төл мерекесіне арналған салтанатты шара өтті. Бұл мереке өңіріміздің ауыл шаруашылығын өркендетуге үлес қосып жүрген жерде еңбек ететін, мал өсіретін, азық-түлік өнеркәсібінде жұмыс істейтін жандардың басын қосты. Салтанатты жиынға қала әкімінің орынбасарлары Руслан Базарбаев, Данияр Шәкәрімов, Семей қаласы әкімі аппаратының басшысы Сержан Азбергенов, қалалық мәслихат хатшысы Бейсенбек Ақжалов, Ауыл шаруашылығы және жер қатынастары басқармасы мамандары, еңбек ардагерлері, шаруа қожалықтар мен кәсіпорындар басшылары, Шәкәрім университеті ветеринария және агроменеджмент факультеті студенттері қатысты.
Дана ТАЛҒАТБЕК,
«Семей таңы»
Халықтың әл-ауқаты мен өмір сапасының жақсы болуы ел экономикасының маңызды саласының бірі ауыл шаруашылығының дамуымен тығыз байланысты.
Жиынды Семей қаласының ауыл шаруашылығы бөлімі басшысының орынбасары Ержан Сүлейменов құттықтау сөзбен ашып, осы жылы облыстың ауыл шаруашылығы саласында жеткен жетістіктеріне қысқаша тоқталды.
— Қазіргі уақытта қала шаруашылықтары қыстамаға кірді. Биыл 122 мың тонна мал азығы дайындалды. Барлық шаруашылықтар, жеке тұрғындар қысқа қажетті мал азығы қорын жинап алды. Сондықтан қыстан қысылмай шығамыз деген ойдамыз. Мал басы көбейіп келеді, ірі қара 7 пайыз, қой 10 пайыз, жылқы малы 14 пайыз көлемінде өсті, бұл — үлкен жетістік. Мұның барлығына шаруашылықтардың қажырлы еңбегінің арқасында, екінші жағынан, мемлекеттік қолдауды тиімді пайдаланудың нәтижесінде қол жеткізіп отырмыз. Сіздер ауыл шаруашылығының дамуына сүбелі үлес қосып жатырсыздар, — деді Ержан Әшімұлы.
Салтанатты шараға жиналғандарды кәсіби мерекемен қала әкімінің орынбасары Руслан Базарбаев та құттықтады.
— Құрметті жерлестер, ауыл шаруашылығы саласының қызметкерлері және қадірлі ардагерлер! Сіздерді төл мерекелеріңізбен шын жүректен құттықтаймын! Сіздердің тер төкті еңбектеріңіздің арқасында өңіріміздің ауыл шаруашылығы саласы дамып келеді. Мемлекет басшысы Қасым-Жомарт Тоқаев ұлықтау рәсімінде алдағы 5 жылда ауылды өркендету ісіне баса назар аудару қажеттігін айтты. Алдағы уақытта ауылды дамыту үшін тиімді жұмыс жүргізілетін болады. Қадірменді жерлестер, бүгінгі мерекені пайдалана отырып, сіздерді осы маңызды шараларды бірлесіп атқаруға шақырамын. Экономиканың басты тетігіне айналған ауыл шаруашылығы саласының гүлденуіне үлес қосып жатқан сіздерге әрқашан құрметіміз ерекше. Бүгінгі мерекеде сіздердің ел игілігі жолындағы қызметтеріңізге табыс, отбасыларыңызға амандық тілеймін! — деп ізгі тілегін білдірді қала әкімінің орынбасары.
Өңірдің ауыл шаруашылығы саласын дамытуда аянбай еңбек еткен ардагерлерге гүл шоқтарын ұсынылды. Сондай-ақ бірқатар сала қызметкерлері «Ерен еңбегі үшін», «Қалаға сіңірген еңбегі үшін» төсбелгілерімен және облыс әкімі мен қала әкімінің алғыс хаттарымен марапатталды.
Салтанатты шарадан соң ауыл шаруашылығы және қайта өңдеу өнеркәсібі қызметкерлерінің құрметіне Қалалық Мәдениет сарайының өнерпаздары мерекелік концерт ұсынды.
