6 желтоқсан күні Семей қалалық әкімдігінде Қоғам кеңес отырысы өтті. Жиынға кеңес мүшелері, әкімдіктің бөлім басшылары қатысты.
Айтолқын САМАТОВА,
«Семей таңы»
Отырыста алдымен Семей қалалық полиция басқармасы жергілікті полиция қызметі бөлімінің бастығы Елдос Оразалиннің есебі тыңдалды. Оның айтуынша, қаладағы криминогендік жағдай тұрақты. Өткен жылмен салыстырғанда қылмыстар саны 59,6%-ға, яғни 2683-тен 1085-ке дейін төмендеген. Ағымдағы жылы қаладағы жол қозғалысы қауіпсіздігінің жай-күйін бақылау бойынша мақсатты жұмыстар ұйымдастырылып, жол және коммуналдық қызмет өкілдерімен бірлесіп, қала көшелері мен жол желілеріне 424 рет тексеру жүргізілген. Оның ішінде орын алған кемшіліктерді жою туралы 395 ұйғарым шығарылып, әкімдікке 20 хат жолданды. Он айдың ішінде Семей қалалық патрульдік полиция батальоны жеке құрамы 27 835 жол жүру ережесін бұзу фактісін анықтаған.
Қоғамдық кеңес мүшелері мал ұрлығының жиілеп кеткенін айтып, бөлім басшысынан қолға алынып жатқан шаралар туралы сұрады. Өткен жылы мал ұрлығына қатысты 41 іс тіркелсе, биыл бұл көрсеткіш 21-ге түскен. Қылмыстың азаюына малға ЖПС трекерлерін орнату, қараусыз кеткен малды айыппұл тұрақтарына қамау және иелеріне айыппұл төлету сынды әкімшілік жазаларды қолдану оң ықпалын тигізген.
Қоғамдық кеңес отырысында Семей қалалық мәслихатының 2019 жылғы 18 қаңтардағы тұрғын үй көмегін көрсетудің мөлшері мен тәртібін айқындау қағидаларын бекіту туралы шешіміне өзгерістер енгізу туралы жобасы қолданыстағы заңнамаға сәйкес қаралды. Жұмыспен қамту және әлеуметтік бағдарламалар бөлімінің бас маманы Елена Овчаренконың айтуынша, «Тұрғын үй көмегін тағайындау» мемлекеттік көмегі қала тұрғындарына 1994 жылдан бастап беріледі. Бастапқыда бұл қызмет орталық жылытуы бар абаттандырылған үйлерде тұратын азаматтарға ғана ұсынылса, 2004 жылдан бастап ШҚО мәслихатының шешімімен пешпен жылытылатын үйлерде тұратын азаматтарға да қатты отын берудің ережесі енгізілді. Бүгінгі таңда қатты отын сатып алуға көмек көрсету қалалық мәслихаттың шешімімен Қазақстан бойынша тек Семей қаласында жүргізілуде.
— Енгізілетін өзгерістерге байланысты тұрғын үй көмегін алушылар саны 50%-ға дейін қысқартылады. Тұрғын үй көмегін, негізінен, зейнеткерлер, мүгедектігі бар адамдар, жұмыссыздар, ең төменгі жалақымен жұмыс істейтіндер алады. Есепті кезеңде 26 261, 0 мың теңге 1291 отбасына тұрғын үй көмегі көрсетілді. 2022 жылы бағдарламаға барлығы 34 228,0 мың теңге қарастырылған, — деді Елена Овчаренко.
Қоғамдық кеңес мүшелері тұрғын үй көмегін алушылар санын қысқартуды емес, көбейтуді ұсынды.
Жиында Семей қаласының бас сәулетшісі Ардақ Исатаев қаланың сол жағалауындағы құрылыс салу жоспары туралы айтып берді. Сәулет және қала құрылысы бөлімі басшысының айтуынша, сол жағалаудағы жаңа көппәтерлі үйлер мен бірнеше әлеуметтік нысандарды салу үшін ескі ғимараттарды бұзу жоспарлануда.
Қазір жоба талқылануда. Ардақ Исатаевтың айтуынша, оң жағалаудағы жылу тапшылығына байланысты құрылыс сол жағалауда басталады.
— Қазір жобаға түзету жұмыстары енгізілуде. 71-ші жылы салынған және одан кейінгі ескі үйлерді бұзуға болады. Келіссөздер жүріп жатыр. 15 желтоқсанда қаланың Жаңасемей бөлігін егжей-тегжейлі жоспарлау бойынша қоғамдық тыңдаулар өтеді. Бірінші кезекте Молдағалиева, Жамбыл көшелерінен бастаймыз,− деді Ардақ Исатаев.
Қоғамдық кеңес мүшелері қалада тұрғын үй құрылысы көптеп салынып жатқанын, бірақ ЖЭО-3 әлі салынбағандықтан жылу жеткіліксіз екенін, бұл жағдай көбіне үй салуда ескерілмейтінін айтты.
— Шешімді мемлекеттік сәулет-құрылыс бақылау басқармасы емес, қала әкімі, сәулет бөлімі қабылдайды. Олар жер бөліп, қала аумағынан салынғалы отырған нысанның бас жоспарға сәйкестігін анықтайды. Сәулетші сәулет-жоспарлау тапсырмасын берген кезде инженерлік желілерді үйлестіру туралы талаптар кө рсетілуі керек. Яғни, мемлекеттік сәулет -құрылыс бақылау басқармасы құрылыс нысанын «салу немесе салмау» туралы шешім қабылдамайды. Біз тек жер телімінің бар-жоғын, нысанның салыну мақсатын, жобалық-сметалық құжаттары мен сараптамасын қараймыз. Құжаттары дұрыс болса, құрылыс салу туралы рұқсат хабарлама жіберіледі. Қазір қала тұрғындары құрылыс нысандары заңсыз салынуда деп шағым айтып жатыр. Біз бұл тұрғыда ешқандай шара қолдана алмаймыз. Өз құзыреттілігіміз аясында біздің міндетіміз құрылыс сапасын бақылау, — деді Азамат Байқазақов.
Кеңес отырысында сонымен қатар Семей қалалық ТҮКШ бөлімінің басшысы Дархан Сейтхановтың абаттандыру жұмыстары туралы есебі тыңдалды.
