7 желтоқсанда республикалық бірыңғай күн аясында барлық облыс орталықтарында «Жаңа Қазақстан» идеясын жүзеге асыру жолында қоғамды топтастыруға бағытталған «Қазақстан халқы Ассамблеясының қоғамдық құрылымдарының қоғамдық келісім мен бірлік саласындағы рөлі» тақырыбында дәрістер ұйымдастырылды.
Абай облысы Қоғамдық даму басқармасының қолдауымен Семей медицина университетінде «Қоғамдық келісімді және ұлттық бірлікті нығайту саласындағы қоғамдық құрылымдардың рөлі» атты семинар өтті. Іс-шараның мақсаты қоғамдық келісім мен бірлікті қамтамасыз етуде Ассамблеяның қоғамдық құрылымдарының рөлін арттыру және осы бағыттарды жандандыру.
Іс-шараға Шығыс Қазақстан облысы ҚХА кәсіби медиаторы Түлетай Танекенова, орыс мәдени орталығының төрағасы Вера Правдина, Шығыс Қазақстан облысы ҰЭМ мүшесі, тарих ғылымдарының кандидаты, С.Аманжолов атындағы ШҚУ доценті Гүлжан Сәрсембаева, Шығыс Қазақстан облысы ҚХА Қоғамдық келісім кеңесі төрағасының орынбасары Алдияр Әубәкіров, «Достық үйі» КММ – «ШҚО УОР» қоғамдық келісім орталығы басшысының орынбасары, «Жастар ассамблеясы» ҚБ төрағасы Равиль Юнусов және қаламыздағы жоғарғы оқу орындарының студенттері қатысты.
Семинар барысында «Қазақстан халқы Ассамблеясы — этносаралық қатынастар саласындағы бірегей медиатор», «Қазақстан халқы Ассамблеясы – мемлекеттің бірлікті, достықты, ынтымақты нығайтудың тиімді құралы», «Халық бірлігі – жаңарған Қазақстанның негізі», «Бірлік, келісім, татулық – біздің мызғымас құндылықтарымыз», «Жаңа Қазақстан – әділетті Қазақстан» тақырыбында дәрістер оқылып, тыңдармандардың ой-пікірі тыңдалды.
— Семинар біздің көп ұлтты Қазақстанның этносаралық өзара қарым-қатынасы мен бірлігін нығайтуға бағытталған. Дәріс барысында Ассамблеяның әр түрлі институттардағы рөлі туралы және этносаралық келісім мен қарым-қатынасты сақтауға және нығайтуға қалай әсер ететіндігі туралы айтылды,- дейді ШҚО орыс мәдени орталығының өкілі Вера Правдина.
Бүгінде әлемде қарулы қақтығыстар болып, шиеленістер ушығып тұр.
Дәріске қатысушылар мен студенттер ұлтаралық дүрдараздыққа жол бермеу саясатын қолдайтындарын білдірді.