Ағымдағы жылдың 21 желтоқсан күні Абай облысының Әдеп жөніндегі кеңестің кезекті отырысы өтті. Жиын барысында мемлекеттік органдардың қызметшілерінің құқықтарының қорғалуы бағытында атқарылған жұмыс нәтижелері және әдеп кодексінің нормаларын бұзу фактісі бойынша тіркелген істер қаралды.
Зарина КӘП
«Семей таңы»
Кездесудің алғашқы баяндамасын мемлекеттік қызмет саласын бақылау басқармасының басшысы Сабыр Мырзабеков бастады. Баяндама барысында Аягөз аудандық прокуратурасының ұсынысы негізінде әдеп кодексінің нормаларын бұзу және мемлекеттік қызметке кір келтіретін тәртіптік теріс қылық белгілері бойынша Аягөз аудандық тұрғын үй-коммуналдық шаруашылық, жолаушылар көлігі, автомобиль жолдары және тұрғын үй инспекциясы бөлімінің басшысы Думан Болатқанұлы Ргаевқа қатысты тәртіптік іс қозғалғандығы туралы және қызметтік тергеудің жүргізілу барысы туралы айтты. Кеңес төрағасы Әділбек Мұқашев және кеңес мүшелері бақылау басқармасына тергеу жұмысын жақын арада аяқтау және тиісті шара қолдану қажеттігі туралы ескертпе жасады.
Сондай-ақ, Абай облысының Мемлекеттік кірістер департаментінің Әдеп жөніндегі уәкілінің атқарған жұмысының есебі тыңдалды.
Жиын соңында Көкпекті ауданы әкімі аппаратының мемлекеттік қызмет және сыбайлас жемқорлыққа қарсы іс-қимыл туралы заңнаманы бұзушылықтардың алдын алу жөніндегі атқарылған жұмысы туралы баяндама оқылды. Кеңес төрағасы Әділбек Қайырбекұлы Көкпекті ауданы әкімі аппаратының басшысы Талант Бақытбекұлына есеп бойынша әдеп кодексінің нормаларын бұзу және мемлекеттік қызметке кір келтіретін тәртіптік теріс қылық белгілері бар оқиғаларды толықтай қарау жөнінде бірқатар ескертулер мен тапсырмалар жүктеді.
