Жаңа жыл көпшілігіміз асыға күтетін, таңғажайыпқа толы отбасылық мереке. Мереке қарсаңында Жаңа жылдың шырайын ашып, келбетін келтіретін жасыл шыршаның орталық алаңда жарқырап тұруы – мерекелік қуаныштың басты нышаны. Осы орайда Қалбатау ауылының орталық алаңында орналасқан жасыл шырша шамы жарқырып жанып, жылдағы дәстүр бойынша салтанатты шара өткізілді.
Аудан әкімі Жарқынбек Байсабыров мерекелік шараға жиналған өңір тұрғындарын келе жатқан Жаңа жылмен құттықтады. Биылғы жылы орталықтағы бас шыршаның айналасында он екі жылдың мүсінін мұздан бейнелеу байқауында үздіктер қатарынан көрінген жеңімпаздар марапатталып, Алғыс хат табыс етілді. Айта кету керек, аудан тұрғындары мен өңірге келетін қонақтарға мерекелік көңіл күй сыйлау мақсатында мұздан жасалған мүсіндеріне байқау жарияланған болатын. Шараға ауданның барлық мекеме ұжымдары мен қызметкерлері бір кісідей ат салыса қатысып, орталықта көз тартар әдемі мұз мүсіндер бой көтерген-ді. Байқау нәтижесінде Мешін мүсінін келістіре жасап, І орын иеленген аудандық жұмыспен қамту және әлеуметтік бағдарламалар бөлімі, Тауық мүсінімен ІІ орыннан көрінген Маяковский атындағы орта мектеп ұжымы, ІІІ орын алған ауыл шаруашылық және кәсіпкерлік бөлімі Жылқы мүсінін келістіре жасап, жүлдегер атанды. Мүсін жасау жұмысына белсене қатысқан жеңімпаз ұжым мүшелері Грамоталар және естелік сыйлықтармен марапатталды. Аудан әкімі өз кезегінде тұрғындарға мерекелік көңіл-күй тарту ету мақсатында ұйымдастырылған байқауға белсенділік таныта қатысқан барлық ұжым қызметкерлеріне ризашылығын білдіріп, шырша шамын жақты.
Орталық алаңға жиналған аудан тұрғындарға жарқырай безендірілген ат шанасымен келген Аяз Ата мен Ақша қар сыйлықтарын ұсынса, ертегі кейіпкерлері мен аудандық Мәдениет үйінің өнерпаздары әннен шашу шашты. Шара соңында от шашу ұйымдастырылып, жастардың би кешіне ұласты.
Кәусар Арықханқызы
«Семей таңы»
