AMANAT партиясының төрағасы Е.Қошановтың тапсырмасы бойынша Екібастұз қаласындағы төтенше жағдайға байланысты шаһардың мыңнан аса кішкентай тұрғынын қысқы каникулда сауықтыру-демалыс орындарына жіберу ісі ұйымдастырылған болатын.
Партияның әр аймақтағы филиалдары, сонымен қатар партия мүшелері де бұл бастамаға бір ауыздан қолдау білдірді. Осы орайда AMANAT партиясының жаңадан құрылған Абай облыстық филиалының ұйымдастыруымен 4-8 қаңтар күндері жүзден аса екібастұздық балақай қысқы демалыстарын Семей қаласының іргесіндегі «KARAGAILY санаториясы» медициналық әлеуметтік мекемесінде өткізді. Еске сала кетсек, KARAGAILY шипажайы — емдік-сауықтыру емшараларының толық кешенін ұсынатын сауықтыру мекемесі. Мұнда балалар білікті медицина мамандарының тексеруінен өтіп, қажет болған жағдайда, ем де қабылдай алады.
Осылайша, өткен аптада KARAGAILY шипажайына 102 екібастұздық бала арнайы шақырумен келді. Балалармен бірге Павлодар облыстық білім басқармасынан бекітілген 11 жетекші ұстаз, екі дәрігер маман келді.
Қаңтардың 4-і күні Семей қаласындағы темір жол вокзалына келіп түскен балалар жол полициясының жол бастауымен KARAGAILY шипажайына жеткізілді.
Шипажайдың бас дәрігері Бағлан Шегедеков алдымен демалуға келген балаларды медициналық тексеруден өткізіп, арнайы ұсыныстар берді. Ем-дом алу шаралары білікті дәрігерлердің қадағалауымен балалардың ата-аналарымен өзара келісу, рұқсат алу арқылы жүргізілгенін айта кету ләзім.
Балалар үшін 4-8 қаңтар аралығында, сауықтыру шараларымен қатар, облыстық әкімдіктің білім, мәдениет, денсаулық сақтау және спорт басқармалары мамандарының бірлесе ат салысуымен мәдени іс-шаралар да ұйымдастырылды. Шипажайда балалардың жақсы демалуына барлық жағдай жасалды. Әр күн тақырып бойынша — «Білім күні», «Мәдениет күні», «Спорт күні», «Жастар күні» болып белгіленгеніп, балалар өз уақыттыран тиімді әрі пайдалы етіп өткізе алды. Мәселен, Білім күнінде екібастұздық балалар үшін AMANAT партиясы облыстық филиалы және білім басқармасы бірлесіп концерттік бағдарлама, сауықтыру-шынықтыру шараларын және оның соңынан жсөспірімдер үшін арнайы би кешін ұйымдастырды.
Сонымен қатар Абай облысы AMANAT партиясының мүшелері барша баланы Жаңа жыл мерекесімен құттықтап, арнайы әкелген сыйлықтарын табыс етті.
Сондай-ақ партияның «Жастар рухы» ЖҚ түрлі конкурстар мен ойындар, тренингтер ұйымдастырды. Күні бойына жоспарланған іс-шаралар «Королевская ночь» балымен қорытындыланды.
— Балалардың қысқы демалысын қызықты етіп ұйымдастыру үшін барлық жағдай қарастырылды. Ең басты мақсатымыз балаларға жақсы көңіл-күй сыйлап, жаңа оқу тоқсанына күш-қуат жинап қайтуларын қамтамасыз ету болды, — дейді ұйымдастырушылар.
Қуаныш ЖОЛЫМБЕТ,
«Семей таңы»
