ЖЕРГІЛІКТІ ӨНІМ ӨНДІРУШІЛЕРДІҢ КӨРМЕСІ ӨТТІ
12 қаңтар күні Семей қаласында жергілікті өнім өндірушілердің көрмесі өтті. Көрмеге «Activity Park» ЖШС, «Ж Құрылыс» ЖШС, «Озон 93» өндірістік кооперативі, «ИП Агапкин Сергей Викторович» ЖК өз өнімдерін ұсынды.
Жадыра ТӨЛЕГЕНҚЫЗЫ,
«Семей таңы»
Қала әкімі Нұрбол Нұрсағатов алдымен «Activity Park» ЖШС өнімдерімен танысты. Семей қаласында орналасқан компания 2016 жылдан бері ойын-сауық орталықтары мен тұрғын үй кешендері аулалары және саябақтар үшін балалар ойынына арналған құрал-жабдықтар жасаумен айналысады. Бүгінгі таңда мекеме ел көлемінде елуден астам жобаны жүзеге асырған.
— 2018 жылы «Даму» қорының демеушілігімен пластикалық өнімдерді балқытуға арналған айналмалы қалыпты жабдық сатып алдық. Полиэтилен және бояулар Ресейдің Қазан қаласындағы «Полимер-Корпорэйшн» компаниясынан жеткізіледі. Барлық өнімдер лабораториялық және техникалық сынақтардан өткен. 2020 жылы біздің өндіріс заманауи жабдықтармен жабдықталып, өндірістің толық циклін өзге ұйымдардың қатысуынсыз жүзеге асыруға мүмкіндік алдық. Құрал-жабдықтар түсті материалдардан жасалғандықтан, киімде із қалдырмайды. Сапаға үш жылға дейін кепілдік беріледі,- дейді компания өкілдері.
— Мені, ең алдымен, өнімнің сапасы алаңдатады. Биыл біз қалаға бірнеше балалар ойын алаңдарын орнаттық. Кейбірі әлден сынып жатыр. Қала тұрғындарынан орнатылған жабдықтардың сапасына қатысты көп шағым түседі,- деген қала әкімі Нұрбол Нұрсағатов аталған компания өнімдерін сатып алуға дайын екенін жеткізді.
Компания ойын лабиринттерін, әткеншектер мен батут алаңдарын, жұмсақ модульдер, аттракциондар, воркаут алаңдарын, құрғақ бассейнге арналған шарлар, Snow Cover жабындысын, көшедегі балалар ойын алаңдарына қажетті және басқа да құрал-жабдықтар жасауға маманданған.
Ал «Ж Құрылыс» ЖШС компаниясы спорт алаңдарына аралған резеңке плиткалар мен ұнтақтар, жиектастар мен тақтатастар, жасанды көгал дайындаумен және сатумен айналысады.
— Биыл сіздердің өнімдеріңізді сынақ үшін сатып алатын боламыз. Егер сапасы көңілімізден шықса, бір жылдан кейін өзге өңірлерден тасымалдауды тоқтатып, жергілікті өндірісті қолдау үшін сіздермен келісімшартқа отыруға дайынбыз,- деді қала әкімі «Ж Құрылыс» ЖШС директорына.
Осыдан соң қала әкімі Нұрбол Нұрсағатов «Озон 93» өндірістік кооперативі жасаған демалуға арналған көше орындықтарын және «ИП Агапкин Сергей Викторович» ЖК-нің шарбақтары мен металл торларын көрді.
Көрме соңында шаһар басшысы жергілікті кәсіпкерлерге өнім сапасын әлі де жақсарта түсуді ұсынып, алдағы уақытта әріптес болуға дайын екенін айтты.
— Биылғы жылға қалада жоспарланған жұмыс көп. Біз облыс орталығын абаттандыру жұмыстарын жүргізіп жатырмыз. Өңірімізде осындай кәсіпкерлердің барына қуаныштымыз. Алдағы уақытта бірлесе жұмыс істейміз деп ойлаймын, — деді қала әкімі Нұрбол Нұрсағатов.
