СЕНАТ ДЕПУТАТТАРЫ САЙЛАНДЫ
Өткен сенбі, 14 қаңтар күні елімізде ҚР Парламентінің жоғарғы палатасы – Сенат депутаттарының кезекті сайлауы өтті.
Бұл жолы Абай облысынан, ҚР Конституциялық заңының 73-бабына сәйкес, Қазақстан Республикасы Парламенті Сенатының депутаттығына үш кандидат тіркелген болатын.
Абай облысында 123 мәслихат депутатының 108-і сайлауға қатысып, өз дауыстарын белгіленген тәртіпке сәйкес жасырын түрде берді. Абай облысының мәслихат хатшысы Қуаныш Сүлейменовтің айтуынша, бұл жолғы Парламент сайлауы ашық және әділ өтті деуге толық негіз бар.
Айта кетсек, таңдаушылардың 50 пайызы дауыс беруге қатысса, «сайлау өтті» деп есептеледі. Ал сайлауға келген таңдаушылардың 50 пайыздан астамының дауысын алған кандидат «сайланған» болып есептеледі.
Абай облысы бойынша сайлау комиссиясының қорытындысына сүйенсек, үміткерлер Кималиддин Апенов 10 дауыс, Анджела Маслова 7 дауыс, Қайрат Тастекеев 89 дауыс жинаса, барлығына қарсы 2 дауыс берілді.
Саяси науқанның алдын ала нәтижесі бойынша, Семей құрылыс колледжінің директоры Қайрат Құлбайұлы Тастекеев ең көп дауыс жинады. Бұл — сайлаудың тек алдын ала қорытындысы. Нақты нәтижені орталық сайлау комиссиясы алдағы күндері жариялайды.
«СТ» — ақпарат
