КӘСІПОРЫННЫҢ ӘЛЕУЕТІ ЖОҒАРЫ
Өткен сенбіде Абай облысының әкімі Абай Нұрлан Ұранхаев Семейдегі цемент зауытына барып, тыныс-тіршілігімен танысты.
Кербез ДУЛАТҚЫЗЫ,
«Семей таңы»
Биыл кәсіпорын өзінің 65 жылдығын атап өтпек. Цемент өндірудің негізгі шикізаты болып табылатын саз бен әктас зауыттың өз карьерлерінде өндіріледі.
Облыстағы ірі кәсіпорындардың бірі болып табылатын Семей цемент зауыты дымқыл өндіріс әдісімен дайындалған клинкерді күйдірудің төрт технологиялық желісінен тұрады.
2018 жылы шаң шығармау, оңай тасымалдау, ұзақ сақтау, сонымен қатар сағатына 2000 қапты шығару сияқты бірнеше артықшылығы бар Германияның жоғары өнімді қаптама желісі орнатылған. Цементті 50 келі полипропиленді қаптарға салу үшін қосымша екі желі іске қосылды. Сондай-ақ өнеркәсіптің меншік вагон паркі де бар. Бұл жерде түрлі цемент пен дайын бетонды шығаруға болады.
Қазіргі уақытта Экологиялық реттеу және бақылау комитетімен 2020-2025 жылдарға айналмалы пештердегі шаң жинағыш қондырғыларды кезең-кезеңімен ауыстыру жоспары жөнінде жасалған келісім жүзеге асырылуда.
Биыл цементті ұнтақтайтын технологиялық желіні салу және іске қосу жобасын жүзеге асыру жоспарлануда. Дүние жүзінде мұндай 6 желі ғана бар.
2022 жылы зауыт есебінен 6 жас маман жоғары оқу орындары мен колледждерде білім алды.
Кәсіпорында сауықтыру орталығы, балабақша, тәулік бойы және тегін қызмет көрсететін асхана жұмыс істеуде, ал 2022 жылдан бастап «Кристалл» жазғы ойын-сауық лагері ашылды.
