ЕҢБЕК АДАМЫНА ІЛТИПАТ
Абай облысында жедел жәрдем қызметінің 22 автокөлік жүргізушісі алғаш рет ҚР Индустрия және инфрақұрылымдық даму министрлігі Көлік комитетінің «Үздік автокөлікші» төсбелгісімен марапатталды.
Дана ТАЛҒАТБЕК,
«Семей таңы»
Жедел жәрдем – әрбір науқастың денсаулығы мен өмірі үшін ұйымдасқан түрде атқарылатын медицина саласындағы өте жауапты қызмет. Бұл қызметте жүргізушілердің кәсібилігі мен өмірлік тәжірибесі сынға түсіп, дер кезінде науқасты керекті ауруханаға жеткізу маңызды орын алады. Жедел жәрдем қызметінің бас дәрігері Владимир Ли атап өткендей, жүргізушілердің еңбегін бағалауда еңбек өтілі, тәжірибесі ғана ескеріліп қоймай, жұмыс уақытында және одан тыс уақытта жол-көлік оқиғаларын болдырмауына да көңіл аударылды.
17 жылдан бері жедел жәрдем қызметінде реанимациялық бригаданың көлік жүргізушісі болып еңбек етіп жүрген Тайжан Жолдасбаев – марапат алғандардың бірі.
— Біз әрбір науқасқа медициналық көмекті дер кеөзінде көрсету үшін жылдам жетуге тырысамыз. Әсіресе біздің бригада мүшелері өзінің әр науқас алдындағы жауапкершілігін сезініп, жұмысын сапалы атқаруға тырысады. Талай жылдан бері реанимациялық бригаданың көлік жүргізушісі болып еңбек етіп жүрмін. «Еңбек бағалануымен құнды демекші», бүгін, міне, біз сияқты қарапайым еңбек адамына құрмет көрсетіліп, марапат алып жатырмыз, өте қуаныштымыз, — дейді Тайжан Жолдасбаев.
Салтанатты шараға дәрігерлер, облыстық денсаулық сақтау басқармасының орынбасары және бақылаушылар кеңесі қатысты.
Айта кетелік, бүгінде Абай облысының жедел медициналық жәрдем станциясының халыққа шұғыл медициналық көмек көрсетуге мүмкіндігі бар. Осы уақытқа дейін облыста жалғыз АН-2 ұшағы болған. Жақында ҚР Денсаулық сақтау министрлігінің Ұлттық шұғыл медицинаны үйлестіру орталығының қолдауымен оған жаңа L-410 лайнері қосылды. Мамандардың айтуынша, жаңа әуе кемесі 2 есе жылдам, әрі L-410 тобының ұшақтары -50°C-тан +50°C-қа дейінгі температура диапазонында экстремалды климаттық жағдайларда ұша алады. Әуе кемесі асфальтталмаған қысқа ұшу-қону жолақтарына қонып-ұшып, жақын және орташа қашықтықтарға ұшуды жүзеге асыра алады.
Медициналық авиация қызметі жұмысын бастағалы өз нәтижелерін де көрсетуде. 2 күн ішінде 4 науқасқа көмек көрсетілді. Облыстың жетекші дәрігерлері 3 жүкті әйелге жедел медициналық көмек көрсету үшін жаңа L-410 ұшағымен Үржар ауылына алғашқы ұшуды жүзеге асырды.
Бұдан кейін авиация қызметінің мобильді бригадасы Аягөз ауданындағы жамбас жарақаты бар науқасты тасымалдады. Науқасқа күрделі ота жасау үшін қалалық жедел жәрдем бөліміне жеткізілді. Әуе кемесінің бортында пациентке толық медициналық көмек көрсету мүмкіндігі қамтылған: 3 науқасты зембілмен тасымалдау, 7 орын қарастырылған.
Медициналық авиация қызметі былтыр 185 ұшуды орындап, 222 науқасқа көмек көрсетті, оның 75-і — балалар. Семейдің тәжірибелі дәрігерлері аймақтарға барып, 14 күрделі ота жасады.
