«ЖЫЛУ СЫЙЛА» АКЦИЯСЫ
Семей шаһарында ҚМДБ-ға қарасты «Зекет» қайырымдылық қорының ұйытқы болуымен «Жылу сыйла!» акциясы аясында «Тегін такси» атты қайырымдылық іс-шарасы бастау алды.
Суық күнде жолда қалған, ашық аялдамаларда көлік күткен жандарды діттеген жерлеріне тегін жеткізіп салу мақсатында көздеген акция, негізінен, мешіт қызметкерлері мен жамағаттың бастамасымен ұйымдастырылып отыр. Әйтсе де оған сауаптан үмітті кез келген адам атсалыса алады.
Акцияның алғашқы күні Семейдегі «Зекет» қорының қызметкерлері аялдамалардағы автобус күткен жолаушыларға ыстық шай таратты, 100-ге жуық жан ыстық сусыннан дәм татты. Суықтан тоңған жолаушылар алғыстарын білдіріп, ізгі тілектерін жеткізіп жатты.
Акция аясында сондай-ақ қала мешіттерінің ұйымдастыруымен көше тазалықшыларына, ашық далада еңбек етіп жүрген коммуналдық қызмет өкілдеріне де ыстық шай, ыстық бәліш тарату, мұқтаж отбасыларға отын-көмір түсіріп беру, әлеуметтік жағдайы төмен жанұяларға азық-түлік жеткізу секілді қайырымдылық шаралары да қоса атқарылатын болады.
Әлібек КЕМЕЛХАН,
«Семей таңы»
