ДЕКЛАРАЦИЯЛАУДЫҢ ЕКІНШІ КЕЗЕҢІ БАСТАЛДЫ
Биылғы жылы елімізде жалпыға бірдей декларациялаудың екінші кезеңі басталды. Бірінші кезең 2021 жылдың 1 қаңтарынан басталып, активтер мен міндеттемелер туралы 250-ші нысанды мемлекеттік қызметкерлер, жұбайлары және оларға теңестірілген тұлғалар табыс етсе, 2023 жылдың 1 қаңтарынан квазимемлекеттік сектордың қызметкерлері мен жұбайлары, мемлекеттік органдардың қызметкерлері тапсыруға міндетті.
Айтолқын САМАТОВА,
«Семей таңы»
Абай өңірлік коммуникациялар қызметінде өткен баспасөз мәжілісінде жеке тұлғалардың кірістері мен мүлкін жалпыға бірдей декларациялаудың екінші кезеңі жайлы Абай облысы бойынша өндірістік емес төлемдер басқармасының басшысы Әсем Тұрлыбекова кеңірек айтып берді.
Айта кетейік, квазимемлекеттік сектор ретінде декларация тапсыратындар қатарына құрылтайшысы немесе қатысушысы мемлекет болып табылатын медицина және білім саласында, ЖШС, АҚ, ұлттық компанияларда қызмет ететін барлық қызметкерлер мен олардың жұбайлары кіреді.
— 250 декларация жалпыға бірдей декларациялауды енгізудің бастапқы нысаны болып саналады. Мемлекеттік қызметке кіретін тұлғаларды қоспағанда, ол бір рет қана толтырылады. Бұл нысанда тек 10 мың АЕК-тен аспайтын қолма-қол ақша көрсетіледі. Негізгі назар шетелдегі мүліктер мен активтерді көрсетуге аударылады. Үйде, банкте немесе депозитте жиналған ақша есепке алынбайды. ҚР уәкілетті органдарында ресми түрде тіркелген жылжымайтын мүліктерді көрсетудің қажеті жоқ. Шетелдегі жылжитын және жылжымайтын мүлік құралдары, жер учаскелері, шетелдегі шоттарыңызда жалпы сомасы 100 АЕК-тан асатын қолма-қол ақша, ҚР аумағында және одан тыс жерлердегі тұрғын үй қорларындағы, заңды тұлғалардағы үлестер, инвестициялық пайлар, бағалы алтын және басқа да декларациядағы міндеттемелер көрсетіледі. Декларация қағаз тасымалдағышта биылғы жылдың 15 шілдесіне дейін және электрондық түрде 15 қыркүйегіне дейін табыс етіледі,- деді Әсем Тұрлыбекова.
Декларацияны электрондық цифрлы қолтаңба болған жағдайда салық кабинеті және e-gov порталы арқылы, сонымен қатар e-salyq azamat мобильді қосымшасында ЭЦК-сыз смс хабарлама арқылы арқылы тапсыруға болады.
— 250-ші нысанда дебиторлық және кредиторлық қарыздарды көрсету талап етіледі. Мұны көбі банктен алған несиелерімен шатастырады. Ресми құжат арқылы жеке тұлғадан немесе жеке тұлға алған қарыз көрсетілуі тиіс. 250-ші нысанды табыс еткен азаматтар жыл сайын жеке тұлғаның мүлкі мен табыстары туралы 270-ші нысандағы декларация толтырады. Жаңа айтып кеткенімдей, мемлекеттік қызметке үміткерлер 250-нысанды толтыруға тиіс. Егер қандай да бір себептермен қызметке алынбаса, жұмыстан босаса немесе зейнеткерлікке кетсе де, 270-нысанды жыл сайын толтыруға міндеттеледі. Мұнда жыл ағымында сатып алынған және сатылған мүлік, табыс көздері ашып көрсетіледі. Сондықтан барлық мәмілелер (әсіресе көлік құралдарына қатысты) ресми түрде жүргізілуі тиіс,- деді Әсем Тұрлыбекова.
Айта кетейік, 2024 жылдың 1 қаңтарынан бастап жеке кәсіпкерлер мен жұбайлары, заңды тұлғалардың құрылтайшылары мен жұбайлары, ал 2025 жылдың 1 қаңтарынан еліміздің барлық тұрғындары декларация тапсыруға міндеттеледі.
