ЖАЙЫЛЫМ МӘСЕЛЕСІ ӨЗЕКТІ
Өткен аптада Семей қаласының әкімі Нұрбол Нұрсағатов Шаған кенті және Жиенәлі ауылдық округінің тұрғындарымен кездесу өткізіп, өтініш-тілектерін тыңдап қайтты.
Әлібек КЕМЕЛХАН,
«Семей таңы»
Қала әкімі алдымен Шаған кентінде болып, жергілікті тұрғындармен кездесті. Кездесуге қатысқан тұрғындар бірқатар мәселелерді көтерді. Шағандықтар кентте макарон цехы ашылса деген ұсыныстарын айтты. Сондай-ақ қысқы мал азығын әзірлеу үшін шабындық жер қажет. Кентте жер телімдерінің жоқтығы әсіресе мал өсірумен айналысатын шаруалар үшін өзекті болып тұр. Сонымен қатар тұрғындар кентке ауыл мәртебесін беру керек деп есептейді. Себебі кент “Ауыл — Ел бесігі” жобасына қатыса алмауда, бұған елді мекеннің ресми мәртебесі кедергі болып тұр. Белгілеген тәртіп бойынша, аталған мемлекеттік бағдарламаға тек ауыл тұрғындары ғана қатыса алады.
Жұмыс сапары барысында қала әкімі Нұрбол Нұрсағатов кенттегі бірнеше нысандарды аралады. Шаған әкімі кенттегі медициналық пункттің жөндеу жұмыстары сапасыз жүргізілгенін айтып шағымданды. Қала басшысы бұл мәселені шешуді аталмыш салаға жауапты орынбасарына тапсырды.
Шаған кенті әкімдігі өз қызметінде халықтың өмір сүру сапасын арттыруға, ауылдық жерлерде қолайлы және жайлы өмір сүруге жағдай жасауға басымдық беріп отыр. Бүгінгі таңда елді мекенде 552 адам тұрып жатыр. Алдағы уақытта тұрғындар санын арттыру да көзделуде.
Қала әкімі Семей шаһарының іргесіндегі Жиенәлі ауылдық округіне де арнайы барды.
Жиенәлі ауылдық округіне екі елді мекен — Бөкенші ауылы және Маралды ауылы қарайды. Округтегі халық саны 820 адам, 189 аула тіркелген.
Нұрбол Нұрсағатов ең алдымен ауылдағы мектепті аралап көрді. Биылғы жылы білім ордасының терезелерін ауыстырып, күрделі жөндеуден өткізу жоспарланып отыр. Қазіргі таңда білім ошағының материалдық базасы толық, оқушылар саны да жеткілікті.
Ауылдық округ әкімдігінің ғимаратында өткен кездесу барысында тұрғындар тарапынан, негізінен, ауыл халқының өмір сапасын арттыру, тұрмысын жақсартуға қатысты сұрақтар қозғалды, жол мен ауыз су жайы да сөз болды.
Дегенмен жергілікті тұрғындардың көпшілігі жайылымдық жердің аздығына наразы. Қала әкімі алдағы уақытта облыстық ауыл шаруашылығы басқармасымен бірлесіп, жайылымдық жерлерді қарастыратынын жеткізді.
Кездесуде Нұрбол Төлегенұлы аталған ауылдық округті абаттандыру бағытында атқарылатын жұмыстармен де таныстырды. Биыл Бөкенші ауылының бірқатар көшелелері жарықтандырылатын болады. Сондай-ақ қар ұстауға арналған қоршау құрылғысын орнату, воркаут алаңын жасау, Маралды ауылына кіреберіс жолды кеңейту жұмыстары жоспарланып отыр.
