ҚОҒАМДЫҚ ТӘРТІП ТҮЙТКІЛДЕРІ ТАЛҚЫЛАНДЫ
Семей қалалық полиция басқармасында жедел кеңес өтті. Жиынға қала әкімі Нұрбол Нұрсағатов пен Семей қаласының прокуроры Саид Аймұхан, облыстық Полиция департаменті бастығының орынбасары Нариман Күлдіков қатысты.
Жиын барысында қалалық полиция басқармасының бастығы Қайрат Әбдіғалиев Семей қаласы полиция басқармасының жедел-қызметтік жұмысының 2022 жылғы нәтижелері туралы есеп берді.
Кеңесте тәртіп сақшыларының күнделікті қызмет барысында кездесетін проблемалық мәселелері ортаға салынып, оларды шешу жолдары талқыланды.
— Мемлекет басшысының алға қойған міндеттерін орындау, профилактикалық жұмыстар жүргізу, сондай-ақ қылмыстардың жолын кесуге қатысты қызметті жетілдіру Полиция басқармасы қызметінің басым бағыттары болып қала береді,- деді Қайрат Әбдіғалиев.
Қала әкімі облыс орталығында қоғамдық тәртіпті қамтамасыз ету аса маңызды екенін, азаматтардың қауіпсіздігі үшін барлық жағдайлар жасалуы тиіс екенін атап өтті.
— Сіздер қылмысқа қарсы күресте үнемі алдыңғы қатардасыздар, халықпен тікелей қарым-қатынаста боласыздар, біздің қала тұрғындарының тыныштығы сіздердің қызметтеріңізбен тікелей байланысты. Қала әкімдігі тарапынан полиция басқармасының материалдық-техникалық базасын жақсартуға көмек көрсетілетін болады. Ескірген техникалық құралдарды жаңғырту, қазіргі заманға сай цифрлық құрылғылардың көмегімен полиция қызметінің бақылауды пәрменді жүргізуін қамтамасыз ету, ол үшін қала бойынша автоматты камералар желісін кеңейтіп, учаскелік полиция пункттеріне қатысты мәселелерді шешу, оларды қазіргі заманға сай техникалық құралдармен жабдықтау қажет. Өткен жылы Семей қаласы аумағындағы криминогендік жағдай тұрақталып, қылмыстық оқиғалар 60 пайыз төмендеді. Бұл қаламыздағы қоғамдық тәртіпті қамтамасыз етуге барлық күш- жігерін салып қызмет етіп жүрген тәртіп сақшыларының ерен еңбегінің жемісі деп білемін,- деді шаһар басшысы Нұрбол Нұрсағатов.
Кеңес барысында қала әкімі қызметтік міндетін мүлтіксіз атқарып, құқықтық тәртіпті сақтауда зор еңбек сіңірген бірқатар учаскелік полиция инспекторларын марапаттады.
Айта кетерлігі, ағымдағы жылы Әуезов, Затон, Орталық полиция ғимараттарын күрделі жөндеуден өткізу жоспарланған. Қазіргі күні тиісті жобалық-сметалық құжаттар әзірленіп жатыр.
Зарина КӘП
«Семей таңы»
