25-26 қаңтар күндері Семей қаласы бойынша №2 облыстық мамандандырылған балалар-жасөспірімдер олимпиадалық резерв спорт мектебінде көркем гимнастикадан жастар арасында қалалық ашық чемпионат өтті. Семей қаласының дене шынықтыру және спорт бөлімі ұйымдастырған жарысқа 75-тен астам спортшы қатысты.
Дана ТАЛҒАТБЕК,
«Семей таңы»
№2 облыстық мамандандырылған балалар-жасөспірімдер олимпиадалық резерв спорт мектебінің директоры Марат Сүлейменов ашық чемпионаттың ерекшелігін атап өтті.
— Қалалық дене шынықтыру және спорт бөлімімен бірлесе ұйымдастырылған чемпионаттың мақсаты – балалар мен жасөспірімдердің көркем гимнастикадан шеберліктерін арттыру, спорттық гимнастикадан спорт шеберлігіне үміткер атағы мен спорттық разрядтар беру. Бүгінде біздің мектебімізде көркем гимнастика бойынша жоғары дәрежелі спортшылар дайындалуда. Бұл спорт түрі облысымызда жақсы дамып келеді. Ауа райының қолайсыздығына қарамастан, Астана қаласынан 8 гимнасшыдан тұратын команда қаламыздағы осы әдемі спорт түрімен айналасатын жас спортшыларға бәсеке құру үшін келді, — дейді Марат Хасенғазыұлы.
Жарысқа 10-16 жас аралығындағы спортшылар қатысып, өз бақтарын сынап көрді. Қалалық ашық чемпионаттың қатысушысы Алина Тәңірберген әдеттегідей тыңғылықты дайындықпен келгенін айтады.
— Мен 4 жасымнан бастап көркем гимнастикамен айналасып келемін. Бұл спорт түрімен шұғылданғаныма осы жылы 11 жыл болады. Жаттықтырушым Оксана Шариповамен бірге көптеген жетістіктерге жеттік, жүлделі орындардан көрініп жүрміз,- дейді Алина Тәңірберген.
Гимнасшылар қалалық чемпионатта жеке топтың бағдарламасы және топтық жаттығулар бойынша сынға түсті. Олардың өнерін екі жоғары ұлттық санатты және бірінші санатты үздік төрешілер бағалады. Олардың қатарында Абай облысы гимнастика федерациясының төрешілері де бар.
Қалалық ашық чемпионаттың бас төрешісі Оксана Викторовнаның айтуынша, қалалық чемпионат жылына 3 рет өтеді. Сондай-ақ әрбір республикалық сайыстың алдында және халықаралық жарыстарға іріктеу ретінде ұйымдастырылады.
Чемпионат қорытындысы бойынша жеңімпаздар мен жүлдегерлер қалалық дене шынықтыру және спорт бөлімінің грамоталарымен және медальдарымен марапатталды. Осы жарыста үздік деп танылған гимнасшылар іріктеліп алынып, республикалық чемпионатқа жолдама берілді.
