Абай облысында алғаш рет ерлер мен әйелдер арасында тоғызқұмалақтан чемпионат өтті. Облыс орталығы Семей қаласында ұйымдастырылған бәсекеге Абай, Ақсуат, Бесқарағай, Жарма мен Үржар аудандарының және Семей қаласының белді тоғызқұмалақшылары жиналды.
Чемпионаттың ашылу салтанатында Шығыс Қазақстан облысы тоғызқұмалақ федерациясының президенті Алтай Ауғанбаев, ардагер спортшы — тоғызқұмалақ қайраткері Мұрат Оқасов, ҚР ұлттық дәрежедегі төрешісі Назым Күзембай сөз сөйлеп, қатысушыларға сәттілік тіледі.
Тоғызқұмалақшылардың ойынына ҚР-ның ұлттық дәрежедегі төрешілері Мұрат Оқасов пен Жарас Исаханов және Назым Күзембай төрелік етті.
Тоғызқұмалақтың классикалық түрінен өткен жарыста ерлер арасында Ақсуат ауданынан келген Диас Жәнібеков соңғы турда басты қарсыласын жеңіп, чемпион атанды. Күміс жүлдені Cемей қаласы Назарбаев Зияткерлік мектебінің оқушысы Еркебұлан Досан қанжығасына байласа, қос қола жүлдені Семей қаласындағы №2 облыстық арнайы спорт мектебінің жаттықтырушылары Әкежан Рамазанов пен Кенже Құрманов өзара бөлісті.
Ал әйелдер арасында ойынның классикалық және блиц түрлерінен Аяна Исахан алдына жан салмады. Аяна — Семей қаласындағы №37 гимназияның оқушысы, №2 облыстық арнайы спорт мектебінде жаттығады, әкесі, бас бапкер Жарас Исахановтың шәкірті.
Жарыстың блиц (шапшаң ойнау) түрі бойынша ерлер арасында Бесқарағай ауданының спортшысы Нұрлан Аханов жеңіске жетіп, спорт шеберлігіне үміткерлер қатарына қосылды. Әкежан Рамазанов күміс жүлдеге, абайлық Нұрали Қайратұлы мен семейлік Алтынбек Құсайынов қола жүлдеге қол жеткізді.
Әйелдер арасында ақсуаттықтар ерекшеленді: Әдемі Серікқалиқызы күмістен, Нұрай Әлиханова қоладан алқа тақты. Ал екінші қоланы семейлік Аружан Оралбаева еншіледі.
Абай облысында тұңғыш рет тоғызқұмалақтан ерлер мен әйелдер арасында өткен чемпионатта ойынның классикалық және блиц түрлері бойынша спортшыларды дайындаған ұстаз–жаттықтырушылар ақсуаттық М.Мағзұмов, абайлық Н.Күзембай, бесқарағайлық С.Амрин, жармалық Е.Сұлтанов пен семейлік Л.Парфиевич пен А.Балықбаеваның еңбектері ерекше.
Алдағы жарыстарда Аягөз, Бородулиха, Көкпекті мен Үржар аудандары мен Курчатов қаласының тоғызқұмалақшыларын да жеңіс тұғырынан көреміз деген ниеттеміз.
А.МЫРЗАХМЕТОВ,
Геодезия және картография колледжінің дене шынықтыру пәні мұғалімі
