30 қаңтар күні Абай облысының өңірлік коммуникациялар қызметінде облыстық бақылау басқармасының 2022 жылы атқарған жұмыстары туралы баспасөз мәслихаты өтті. БАҚ өкілдерімен кездесуге Абай облысының бақылау басқармасының басшысы Азамат Байқазақов, облыстық бақылау басқармасының орынбасарлары Ерлан Ниятқабылов, Шыңғыс Аманжолов қатысты.
Дана ТАЛҒАТБЕК,
«Семей таңы»
Өткен жылы басқармада жеке және заңды тұлғалардың 531 өтініші қабылданып, оның ішінде сәулет-құрылыс бақылау мәселелері бойынша – 337 өтініш, еңбек заңнамасы, қауіпсіздік және еңбекті қорғау мәселелері бойынша 194 өтініш қаралған. Сәулет-құрылыс бақылау және қадағалау саласында 30 жоспардан тыс тексеру жүргізілген, оның шеңберінде 30 субъект әкімшілік жауапкершілікке тартылды.
— Құрылысқа қатысушылар жіберетін негізгі бұзушылықтарға, атап айтатын болсақ, жобалау құжаттамасын әзірлеу, сараптау және бекітудің белгіленген тәртібінен ауытқу, сәулет-құрылыс бақылау және қадағалау органын хабардар етпей құрылыс-монтаждау жұмыстарын жүргізу, құрылысты техникалық және авторлық қадағалаусыз жүзеге асыру жатады. Мәселен, рұқсат құжаттарының жоқтығы үшін 29 тапсырыс беруші әкімшілік жауапкершілікке тартылды. Құрылыс-монтаждау жұмыстарын сапасыз жүргізгені үшін 11 мердігер ұйым әкімшілік жауапкершілікке тартылды, — деді облыстық бақылау басқармасының басшысы.
Азамат Қайырбекұлының айтуынша, құрылыс субъектілері көп жағдайда бұзушылықтарға жол беріп жатады. Мәселен, салалық заңнаманы білмеу, жобалау ұйымдарының жобалық құжаттаманы сапасыз әзірленуі, мердігерлік ұйымдардың құрылыс-монтаждау жұмыстарын сапасыз орындауы, техникалық және авторлық қадағалау тарапынан әлсіз бақылауы, сайып келгенде, құрылыстағы заңнама мен мемлекеттік нормативтердің бұзылуына әкеледі. Құрылыс субъектілеріндегі бұзушылықтарды азайту және құрылыс сапасын арттыру мақсатында басқарма сәулет, қала құрылысы және құрылыс қызметі саласындағы заңнама нормаларын түсіндіру жолымен сәулет-құрылыс қызметі саласындағы бұзушылықтардың алдын алу жөніндегі жұмысты күшейтеді, сондай-ақ құрылыс, жобалау, техникалық және авторлық қадағалауларды жүргізу кезінде нормалар мен мемлекеттік нормативтерді қолдану бойынша құрылысқа қатысушылармен семинар-кеңестер өткізеді.
Басқармаға жеке қабылдауға келген 240 қызметкерге еңбек заңнамасы турасында түсініктемелер берілген. Бұл ретте 24 жоспардан тыс тексеру жүргізіліп, 42 бұзушылық анықталған. Бұзушылықтардың бірқатары негізінен жалақыны уақтылы төлемеу, төлемді кешіктіргені үшін өсімпұлды есептемеу, қызметкерлерді үстеме жұмыстарға, мереке және демалыс күндеріндегі жұмысқа тарту, еңбек шартын жасамау, тәртіптік жаза қолданумен келіспеу, еңбек қызметіне байланысты жазатайым оқиға туралы хабарламаудан тұрады.
Мемлекеттік еңбек инспекторлары еңбек заңнамасының бұзылуына жол бермеу мақсатында еңбек ұжымдарында тұрақты түрде түсіндірме әңгімелер жүргізеді. Алдыңғы жылдың 6 айында 150-ден астам қызметкердің қатысуымен кәсіпорын ұжымдарымен 30 кездесу өткізілді.
Облыста 2 мыңнан астам жұмыс берушілер жұмысшыларды жазатайым оқиғалардан міндетті сақтандыру шарттарын жасады. Бақылау басқармасының басшысы облыстағы өндірістік жарақаттану бойынша мәліметтер келтірді.
— Еңбек инспекторларының зерттеу нәтижесінде өндірісте барлық зардап шеккен қызметкерлердің саны 22 адамды құрайды, оның ішінде 12 адам ауыр жарақат алды, 2 адам қайтыс болды, 8 адам жеңіл жарақат алды. Басқармада полиция органдары, денсаулық сақтау ұйымдарымен бірлесе отырып, жасырын жарақат алу фактілеріне жол бермеу бойынша тұрақты жұмыстар жүргізілуде. Облыстың 13 ұйымында еңбек жағдайлары бойынша өндірістік объектілерді аттестаттау өткізілді, онда 581 жұмыс орны аттестатталды, оның ішінде 303 жұмыс орны зиянды еңбек жағдайларында жұмыс істейді, — дейді басқарма басшысы.
Қазіргі уақытта өндірістегі жазатайым оқиғалардан сақтандыру шарттарын жасасу мониторингі жүргізілуде. Азамат Байқазақов сөз соңында басқарма облыстағы 5 ірі кәсіпорындағы бақылау субъектілерін аралап, еңбек заңнамасының сақталуына, қауіпсіздік және еңбекті қорғау бойынша профилактикалық бақылау жүргізуді жоспарлап отырғанын атап өтті.
