Жоғары білім
Өткен жұма, 3 ақпан күні облыс әкімінің орынбасары Шалқар Байбеков аймағымыздағы университет ректорларымен және жоғары мектеп өкілдерімен кездесті.
Айтолқын САМАТОВА,
«Семей таңы»
Бүгінгі күні Абай облысындағы үш жоғары оқу орнында 20833 студент білім алуда. Оның ішінде 14676-сы, немесе 74,4 пайызы күндізгі бөлімде оқиды.
Кездесу барысында қоғамдық даму басқармасының басшысы Айдар Садырбаев облыстағы жоғары оқу орындарымен бірлескен жұмыс туралы айтып өтті.
— Аймағымыздағы жоғары оқу орындары 163 мамандық бойынша кадрлар даярлайды. Профессорлық-оқытушылық құрам 1217 адамнан тұрады. Оның ішінде 103 ғылым докторы, 415 ғылым кандидаты, 260 phd докторы мен 439 магистр дәрежесі бар оқытушылар бар, — деді А.Садырбаев.
Қоғамдық даму басқармасы басшысының айтуынша, студенттердің бос уақытын ұйымдастыру мақсатында 23 жастар ұйымы жұмыс істейді. Бұл ұйымдардың жұмысына 4156 (28,3%) белсенді студент қатысады.
— Ағымдағы оқу жылына 127 іс-шара жоспарланған. Биыл басқарма тарапынан «Студенттік көктем», «Жігіт сұлтаны», «Қозы Көрпеш – Баян сұлу», «Жастар театрларының байқауы», «Вена балы», «Ауыл жастарының форумы» сияқты жоғары оқу орындарымен бірлескен жобалар іске асырылады, — деп атап өтті қоғамдық даму басқармасының басшысы.
Биылғы жылдың наурыз айында Alikhan Bokeikhan University студенттері үшін 500 орынға арналған жатақхана пайдалануға беріледі деп күтілуде.
— Қарағайлы шағын ауданында Семей медицина университетінің студенттеріне арналған 1000 орындық жатақхана құрылысы бірнеше жылдан бері тоқтап тұр. Бүгінгі күні жобалық-сметалық құжаттама әзірленіп, ҚР Денсаулық сақтау министрлігіне жолданды. Республикалық бюджеттік комиссия қарауына жіберіліп, қолдау таппады,- деді Айдар Садырбаев.
Өз кезегінде, ЖОО басшылары мемлекеттік органдармен ынтымақтастықты күшейту және студенттердің бос уақытын тиімді пайдалануға байланысты ұсыныстарын білдірді. Аталған ұсыныстар бойынша бірлескен шаралар қабылданатын болады.
