Қала әкімі Нұрбол Нұрсағатов 7 ақпан күні «Семей Водоканал» МКК басшысы Еркен Сағындықов және Семей қаласының Төтенше жағдайлар басқармасы басшысының орынбасары Қымбат Көпбаевпен бірге Би Боранбай және Широкая көшелеріне барып, су басқан аумақтарды аралап шықты.
Зарина КӘП,
«Семей таңы»
Еске сала кетсек, 6 ақпан күні кешке Семейдегі «Загородная 2» диаметрі 1200 миллиметрлік кәріз дюкері бітеліп қалып, соның салдарынан Би-Боранбай көшесі бойындағы үйлер мен «Цементник» стадионының аумағын су басқан болатын. Қазір жеке үйлердің аумағын су басу қаупі жоқ. Семей әкімі Нұрбол Нұрсағатов апат салдарынан су басқан аулаларды әкімдік толығымен қалпына келтіретінін жеткізді.
Коммуналдық қызмет апат болған сәттен бастап тас жол мен жеке тұрғын үй секторының бойында жағалауды бекітуге кірісті, сонымен қатар тұрғын үйлердің аулаларына кірген ағын суды сору жұмыстарын жүргізді. Жедел штаб құрылып, оқиға орнына әкімдіктен, төтенше жағдайлар департаментінен және Төтенше жағдайлар министрлігінің №68303 әскери бөлімінен 115 адам мен 46 техника жұмылдырылды. Суды тоқтату үшін инертті материалдар салынған 600-ден астам қап төселді.
Жұмыс түні бойы үзіліссіз жүргізілді. 7 ақпан күні жеке тұрғын үйлер аумағын судан тазартып, 2800-ден астам шаршы метр су сорылды.
ТЖМ мәліметінше, 16 аула мен алты үй су астында қалған. Мал қоралары, көмір тұратын орын мен жертөлелерге, алты үйдің бөлмелеріне дейін су кірген.
Семей қаласының әкімі Нұрбол Нұрсағатов кәріз құбырының жарылуы салдарынан үйлері зақымданған Широкая көшесінің тұрғындарымен кездесіп, апатты жағдайдың себебін түсіндірді.
– Жер астындағы темірбетон құбырлары істен шығып, төтенше жағдай орын алды. Соның кесірінен коллектор тақтасы бітеліп қалған. Суды тоқтату оңай болмады, құбырдың бітелген тұсын анықтау үшін, бір шақырым жер қазылды. Қазір құбырдың жарылған жері жөнделіп, қалыпты жағдайда жұмыс істеп тұр,- деді Нұрбол Төлегенұлы.
Қала әкімдігі жеке үйлердің аумағын су басу қаупі жоқ екенін айтты. Жағдай толық бақылауда. Семей әкімі Нұрбол Нұрсағатов апат салдарынан су басқан аулаларды әкімдік толығымен қалпына келтіретініне уәде берді.
– Бүгін түнімен көше бойындағы суды толықтай сорып, тазарту жұмыстарын жүргізетін боламыз. Жеке тұрғын үйлерге аса қатты зардап келмеген. Менің тапсырмам бойынша арнайы комиссия құрылды. Кешке дейін су астында қалған 6 үйді, ертең аулаларды көреді. Содан кейін қалпына келтіру жұмыстарын бастаймыз. Жөндеу жұмыстары жүргізіліп, келтірілген шығындардың барлығы әкімдік тарапынан өтелетін болады,- деді қала әкімі.
Қазіргі таңда оқиға орнында Семей қаласы әкімдігінің ТҮКШ бөлімінің мамандары және ТЖБ қызметкерлері жұмыс істеуде. Аулаларына су кірген үйлердің толық тізімі жасалып, тексеру жұмыстары жүріп жатыр.
