Қала әкімі Шаған және Жиенәлі округінен кейін жұмыс сапарымен Достық ауылдық округіне барды. Шаһар басшысының айтуынша, ауылдағы ең өзекті мәселесі — су құбырының құрылысының аяқталмауы. Қазіргі таңда мердігер ұйымға әкімдік тарапынан түсініктеме жұмыстары жүргізіліп жатыр. Егер мердігер ұйым жұмыстарын толығымен аяқтамаса, қала әкімдігі келісімшартты бұзуға құқылы екенін ескертті. Сондай-ақ әкім өз сөзінде су құбырының құрылысын аяқтау бойынша жұмыстар жүргізіліп жатқандығын атап өтті.
Достық ауылдық округінің бюджеті 2023 жылы 1,6 есеге ұлғайып, 112,1 млн теңгені құрады.
Нұрбол Нұрсағатовтың мәлімдеуінше, Шақаман ауылының орталығында футбол алаңы орнатылады. Достық ауылдық округі әкімдігінің ғимаратында өрт дабылын орнату қарастырылған. Шақаман ауылындағы 11 көшені жарықтандыруға 13 941 673 теңге бөлінді. Жұмыстар жоспар бойынша осы жылдың соңына дейін аяқталады. Сонымен қатар Шақаман орта мектебінде 104 терезе блоктарын жөндеу жоспарланған.
