Семейде Абай облысы білім басқармасының облыстық инновациялық-әдістемелік орталығының ұйымдастыруымен дәстүрлі «Педагогикалық идеялар фестивалі» республикалық байқауының облыстық кезеңі өтті.
Айтолқын САМАТОВА,
«Семей таңы»
Байқауға облысымызға қарасты қалалар мен аудандардағы білім беру ұйымдарының директорлары, директордың орынбасарлары, білім беру ұйымдарының педагогтері, мектепке дейінгі ұйымдардың тәрбиешілері мен әдіскерлері, музыка жетекшілері, қосымша білім беру педагогтері, сынып жетекшілері, психолог, логопед мамандар, дарынды балалармен жұмыс істейтін орталықтардың әдіскерлері қатысты.
— Абай облысында бұл байқау алғаш рет өтіп отыр. Фестивальдың мақсаты – педагогтердің шығармашылық әлеуетін дамыту және жаңашыл идеяларын жүзеге асыру, кәсіби өсуін ынталандыру, облыс мектептерінің басшылары мен мұғалімдерінің инновациялық тәжірибесін зерделеу және тарату,- дейді инновациялық-әдістемелік орталықтың баспасөз хатшысы Салтанат Амантайқызы.
Байқауға қатысушылардың бірі Аягөз қаласындағы көпбейінді қазақ мектеп-гимназиясының бастауыш сынып мұғалімі Анар Наурызбаева дүниетану пәнінен 3-сынып оқушыларына электрондық анықтама құрастырған.
— Білім беруде оқулықтарды ғана емес, электрондық ресурстарды да пайдалану керек. Бастауыш сынып оқушыларына интернеттен қосымша ақпарат іздеу қиынырақ. Сондықтан мен дүниетану пәнінен 3-сынып оқушылары үшін электрондық анықтама құрастырдым. Бұл оқушыларға уақытын үнемдеуге және сұрағына жауап алуға көмектеседі, — дейді Анар Наурызбаева.
Байқау «Білім беру жүйесіндегі менеджмент», «Шеберлік палитрасы», «Шығармашыл толқын», «Сабақ аяқталған соң…», «Психолог сандықшасы» бағыттары бойынша өтуде.
— Мен мектепте 40 жылдан бері жұмыс істеп келемін. Әрине, осы уақытқа дейін білім беру саласында біршама тәжірибе жинақтадым, жаңа идеялар да пайда болды. Бүгін байқауға ұсынып отырған идеямды бірнеше жыл бұрын ойлап тапқанмын. «Барлығы салыстыру арқылы белгілі болады» деген ұлы француз философы Рене Декарттың қанатты сөзі бәрімізге таныс. Мен оқушыларға өмірдегі жағдайларды салыстыру арқылы тануға, сараптауға үйретемін. Мәселен, жоғары сыныптар оқитын әдеби шығармаларды бесінші сыныптың оқу бағдарламасындағы шығармалармен немесе классикалық шығармалардың үзінділерін қазіргі заманғы фильмдермен салыстырамын. Біздің облысымызда бұл байқау алғаш рет өтіп жатыр және мен қуана-қуана өз идеямды өзгелермен бөлісуге әзірмін,- дейді Бородулиха ауданындағы Жезкент кентінің орыс тілі және әдебиеті пәнінің мұғалімі Инна Арзамасова.
Байқаудың жеңімпаздары наурыз айында Алматы қаласында өтетін республикалық байқауда облысымыздың намысын қорғайтын болады.
