15 ақпан күні Абай облысы бойынша «Табысты отбасы» жобасының екінші кезеңінің 41 қатысушысы оқуын аяқтағаны туралы сертификат алды.
Айтолқын САМАТОВА,
«Семей таңы»
Салтанатты шараға облыс әкімдігінің және «Самұрық-Қазына» АҚ портфельдік компанияларының өкілдері, қоғам белсенділері, бизнес-тренерлер мен жоба тәлімгерлері қатысты. «Samruk-Kazyna Trust» қорының өкілдері және жоба авторы Айжани Нұрланова екінші лектің түлектерін онлайн форматта құттықтады.
Жалпы, бұл күні Абай, Ақтөбе, Жетісу және Ұлытау облыстарының 143 тұрғыны «Табысты отбасы» әлеуметтік жобасы аясында «SMM», «Автоэлектрик», «Бьюти индустрия», «Кондитер ісі», «Тігін ісі» мамандықтары бойынша оқуын аяқтағаны туралы сертификат алды. Қатысушылар курс барысында сондай-ақ жеке даму бойынша тренингтерден өтті.
— Біздің Қор жұмысының басты бағыттарының бір — облыстар мен алыс өңірлердің тұрғындарына медициналық және әлеуметтік көмек көрсету. Сіздер алған білімдеріңізді одан әрі тәжірибеде қолданып, қаржылық тәуелсіздікке қол жеткізеді деп сенемін,- деп «Самұрық-Қазына» АҚ қоғамдық желімен байланыс, әлеуметтік-еңбек қатынастары және еңбекті қорғау жөніндегі басқарушы директоры Ғибрат Ауғанов төрт облыс бойынша жобаның екінші кезең түлектерін құттықтады.
Ерекше қажеттіліктері бар баланың анасы, Абай облысының тұрғыны, Эльмира Даутова жоба туралы өз әсерімен бөлісті.
— Мен мұндай жобаға алғаш рет қатысып отырмын. «SMM» бейіндік бағытын таңдадым. Шынымды айтсам, жобадан өзім күткеннен де көп білім алдым. Бір ай оқығаннан кейін әлеуметтік медиа менеджері болумен қатар, бизнес-жоспар құруды және жеке дамуды үйрендім. «Табысты Отбасы» жобасының барлық ұйымдастырушылары мен демеушілеріне алғысымды білдіремін,- деді Эльмира Даутова.
Айта кетейік, бірінші лекте бес облыста 114 қатысушы оқудан өтіп, жабдық түрінде гранттарға ие болса, екінші кезең бойынша 186 қатысушы сертификат алды. Түркістан облысы бойынша екінші лекке қатысушыларға сертификаттарды тапсыру 17 ақпанда Сарыағаш қаласында өтеді.
Бағдарлама «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» әлеуметтік жобаларды дамыту қорының қаржылай қолдауының арқасында іске асырылуда. Жоба туралы толығырақ @tabysty.otbasy жобасының инстаграм-парақшасынан білуге болады.
