Бүгінгі таңда облыста ерекше қажеттіліктері бар 26589 адам есепте тұрса, оның 3015-і — бала- лар. Алайда олардың тек 13 пайызы ғана спортпен шұғылдана алады.
Облыс әкімінің орынбасары Шалқар Байбековтің төрағалығымен өткен жиында ерекше қажеттіліктері бар адамдар арасында спортты дамыту мәселесі қозғалды. Дөңгелек үстел басында Абай облысы әкімінің орынбасары Ш.Байбеков, дене шынықтыру және спорт басқармасының басшысы Е.Әбілқасымов, мүмкіндігі шектеулі жандарға арналған спорт клубының директоры А.Жақыпов және әр түрлі деңгейдегі мүмкіндігі шектеулі жандармен тікелей жұмыс істейтін орталықтардың өкілдері облысымыздағы параспортшылар тап болатын негізгі мәселелерді талқылады. Жиынға қатысқан жаттықтырушылар мен спортшылар мүмкіндігі шектеулі жандар арасында спортты дамытуға қатысты өз ұсыныстары мен пікірлерін ортаға салып, сұрақтарын қойды. Дөңгелек үстелге қатысушылар ойын алаңдары мен спорт залдарының аздығы, жаттығу құралдарының жетіспеушілігі, инватакси мәселесі, мүмкіндігі шектеулі жандардың бассейнге баруы, спортшыларды ынталандыру, тағы да басқа мәселелер төңірегінде сөз қозғады. Ең маңызды мәселелердің бірі – мүмкіндігі шектеулі жандарды көлікпен қамтамасыз ету. Бұл ретте жол жүру ақысы бөлек көрсетілген. Кейбір параспортшылар оның толық құнын төлеуге мәжбүр. Сонымен қатар қоғамдық көліктердің көпшілігі ерекше қажеттіліктері бар адамдарға бейімделмеген. Жиында айтылғандай, облыста дзюдо, таэквондо, армрестлинг, жүзу, отырып ойнайтын волейбол, жеңіл атлетика сынды паралимпиадалық спорт түрлері қарқынды дамып келеді. Қазақстандық спортшылар Паралимпиада ойындарында бірнеше рет шеберліктерін көрсетті. Алайда, спортшылар атап өткендей, қаржыландырудың жетіспеушілігі жақсы нәтижеге жетуге үлкен кедергі болып отыр. — Бұл кездесу мүмкіндігі шектеулі спортшыларға бірінші кезекте не қажет екенін білу үшін маңызды, − деп атап өтті Шалқар Байбеков.
Облыс әкімінің орынбасары көтерілген мәселелер шешімін табатынын айтты.
— Мүмкіндігі шектеулі жандардың спорт мекемелеріне баруын қамтамасыз ету мәселесін қарастырып, мамыр айында инватаксилерді қолданысқа береміз, сондай-ақ алдағы бес жыл көлемінде мүмкіндігі шектеулі жандарға арналған мекеме салу жоспарымызда бар,- деді Шалқар Заманбекұлы.
Сондай-ақ ерекше қажеттіліктері бар спортшылардың өкілдері саңырау спортшылар үшін жарыстарға қатысуға қажетті сертификаттарды жылдам алуға мүмкіндік беретін жеке диспансер құру туралы ұсыныс жасады.
– Бүгін осы мәселелер бойынша алғашқы кеңейтілген отырысты өткіздік, алдағы уақытта тоқсанына бір рет жиналып, шешімін күткен мәселелерді талқылаймыз деп ойлаймын. Иә, мәселелер бар, бірақ кешенді іс-шаралар арқылы оларды тиімді шешуге болады. Отырыс қорытындысы бойынша жақын арада хаттама-өкім жасалып, бірінші кезектегі міндеттер шешілетін болады,- деді Шалқар Байбеков.
Мүмкіндігі шектеулі жандарға арналған спорт клубының директоры Арнұр Жақыпов биыл мүмкіндігі шектеулі жандар арасында спорттық жарыстар ұйымдастырылып, Абай облысының құрама командасы жасақталатынын айтты. Қазіргі күні мүмкіндігі шектеулі жандар арасынан спортшылар құрамасына іріктеу жүргізілуде. Жаттықтырушылар спортшыларды алдағы жарыстарға дайындап жатыр, сонымен қатар паралимпиадаға іріктеу жүргізілетін болады, үстел теннисі мен волейбол құрамаларын жасақтау да жоспарда бар. Ұлттық құрамада голбол, жеңіл атлетика, жүзу, армрестлинг, арбада билеу және т.б. спорт түрлері ұсынылады. Сөз ретінде айта кетсек, жазғы, қысқы олимпиадаларда, әлем чемпионаттары, Азия ойындарында, спартакиадаларда еліміздің паралимпиадашыларының жеткен жетістіктері аз емес. Әлемдік рекордты жаңартқан Зүлфия Ғабидуллина, Азия рекордын жаңартқан Әнуар Ахметов, арбадағы биден әлем чемпионатының қола жүлдегерлері Ардақ Отарбаев пен Факия Шикова сынды қандастарымыздың қажыр-қайратына қалай риза болмассыз. Ал Софияда өткен Сурдолимпиадалық ойындарда отандасымыз Ғабит Есжанов алтын медальді еншілесе, Сиязбек Дәлиев жүзуден Дүниежүзілік мүгедектер ойындарының жеңімпазы атанған. Осындай тағдыр сынағына мойымаған рухы мықты қайсар жандар көк байрағымызды әлемдік додаларда желбіретіп, әнұранымызды көк аспанда қалықтатып жүр. Оларға тиісті жағдай жасала бермек.
Азамат СЕРІКҰЛЫ,
Шәкәрім университеті студенті
