Әлихан Бөкейхан университетінде «Елім-ай» футбол клубы мен Jusan bank-тің серіктестік бағдарламасының тұсаукесері өтті.
Айтолқын САМАТОВА,
«Семей таңы»
Іс-шараға Абай облысы Футбол федерациясының президенті Виталий Каган, Абай облысы Қоғамдық даму басқармасының басшысы Айдар Садырбаев, Абай облысының Дене шынықтыру және спорт басқармасы басшысының орынбасары Ержан Естаев, «Jusan Bank» АҚ өңірлік филиалының басшысы Әділет Оралбеков және БАҚ өкілдері мен клуб жанкүйерлері қатысты.
«Jusan Bank» АҚ өңірлік филиалының директоры Әділет Оралбеков екі тарап арасындағы серіктестік бағдарлама туралы айтып берді. Оның айтуынша, банк «Елім-ай» футбол клубының жанкүйері үшін арнайы карта шығарады. Карта иелері «Елім-ай» футбол клубының барлық жергілікті матчтарына және серіктестік желі өкілдерінің де жеңілдіктеріне қол жеткізе алады.
— Біз бала кезден «Елім-ай» клубының ойынын көріп өстік. Араға 25 жыл салып қайта құрылған клубқа қолдау көрсетуді құп көріп отырмыз. Енді жанкүйерлерге арналған арнайы карта болады. Онда бірқатар серіктестер арқылы жанкүйерлерге жеңілдіктер қарастырылады»,- дейді «Jusan Bank» АҚ өңірлік филиалының директоры Әділет Оралбеков.
Қазіргі уақытта серіктестік желіге бірқатар жергілікті шағын және орта бизнес өкілдері – супермаркеттер, дәріханалар, қоғамдық тамақтану орындары, автокөлік жуу орындары және басқа да нысандар кіреді.
— Бұл әлемдік тәжірибеде бар. Футбол жанкүйері абонементті бір рет сатып алу арқылы маусымдағы барлық жергілікті мачтарды тамашалай алады. Карта он мың теңге тұрады. Осы арқылы жанкүйерлер футбол клубының дамуына да өз үлесін қосады. Футбол маусымы басталғанға дейін карта сатылымға шығады деп ойлаймын,- деді Әділет Оралбеков.
Іс-шара барысында қатысушыларға Абай облысы футбол федерациясының президенті Виталий Каган таныстырылды. Ол Абай облысындағы және Семей қаласындағы футболды дамыту жоспарларын таныстырды.
— Біз өңірде футболды дамыту бойынша кешенді жоспар әзірледік. Оның ішінде Абай облысында манеждар мен стадион салуды көздеп отырмыз,- деді ол.
Жаңа стадион барлық қажетті инфрақұрылыммен жабдықталатын болады. Келушілерге ыңғайлы болу үшін оның жанында кафе мен қонақүй ашу жоспарлануда.
Сонымен қатар «Abay IT Valley» технологиялық кластері «Елім-ай» футбол клубының бірқатар цифрлық жобаларын құрастырып жатқанын мәлімдеді. Оның қатарында «elim i» мобильді қосымшасы, 3D визуал жобасы, Elimai: Football Fever ойыны және басқа да жобалар бар. Семей мектептерінде арнайы футбол сыныптарын ашу жоспарланып отыр.
Жиын соңында «Qazaq Astyq Group» ЖШС бас директоры Еркінбек Досқожанов «Елім-ай» футбол клубының ресми демеушісі болуға ниет білдірді.
Айта кетейік, Виталий Каган – Семей қаланың тумасы, «Автомобилист» командасының бұрынғы ойыншысы, ҚазКСР, КСРО кубогының иегері және финалисі. КСРО және ҚазКСР-дің 200-ден астам чемпионаттарында, Қазақстан чемпионатында және бірнеше халықаралық матчтарда (ФИФА төрешісі) төреші болған.
«Жоғары санатты ұлттық төреші», «Қазақстан Республикасының үздік футбол инспекторы» атақтарының иегері, Қазақстан Футбол федерациясының инспекторы.
