Теміржолшылардың екі буыны қалыптасқан әулет өздері таңдаған кандидатқа дауыс берді. Бұл отбасы бірде-бір сайлау күнін жібермей, қатысып келеді.
Отағасы Жұмағазы Адалов атап өткендей, сайлау кез келген демократиялық, құқықтық мемлекетте өте маңызды процесс.
– Біздің таңдауымыз халық үшін маңызды. Барша қазақстандықтарды сайлауға қатысып, жарқын болашақты бірге қалыптастыруға шақырамын. Сонымен қатар, барша жерлестерді келе жатқан жақсылық пен жаңару мерекесі Наурыз мейрамымен құттықтаймын, – деді Жұмағазы Адалов.
Оның ұлы Ерлан Адалов та ұзақ жылдар теміржол саласында еңбек етсе, оның жолын бүгінде ұлы жалғастырып, теміржолшы мамандығы бойынша білім алуда.
– Әкеміз көп жыл темір жолда еңбек етті, мен де осы саладамын, қазір ұлым теміржолшы болуға дайындалып жүр. Біз әрдайым сайлауға қатысамыз, себебі бұл еліміздің болашағы. Елімізде лайықты заңдардың қабылдануы және оның жұмыс істеуі үшін де осы сайлау өтіп жатыр. Бүгін отбасымен келіп, таңдауымызды жасадық. Біз өз округіміздегі кандидаттарды білеміз. Ең бастысы, сайланбалы тұлғалар өз бағдарламасын жүзеге асырады, жұмыс істейтін заңдарды қабылдайды. Қазір елімізде береке-бірлік бар, болашақта бұдан да жақсы болады деп ойлаймын, — деп ойымен бөлісті Ерлан Адалов.
