Еріктілер әлеуметтік желіде ерекше оқиғамен бөлісті. Олардың сөзінше, ресейлік әйел әкесін 25 жылдан кейін Қостанай облысынан тапқан деп хабарлайды Stan.kz ақпарат агенттігі.
Нина Мәскеуде тұрады, бірақ Қазақстанға кетіп қалған әкесімен қайта қауышқысы келген. Осылайша ол еріктілердің көмегіне жүгініпті.
«Нина әкесін талай жылдан бері іздеген. Бірақ әкесі балаларына керек емеспін деп ойлап, туыстарына кедергі болғысы келмеген. Әрі құжаттары болмағандықтан, туған жеріне кете алмапты», – дейді еріктілер.
Алексей ажырасқан соң балалары әйелімен Мәскеуде қалған. Ал өзі Қазақстанда тұратын ағасына келіп, осы жақта қалып қойыпты. Ол қызын іздеп, “Однаклассники” желісіне жазған екен. Алайда Нина парақшасының құпия сөзін ұмытып қалғандықтан әкесінің хатын көрмеген.
Іздеу жұмыстары қиынға соғатынын біле тұра еріктілер бұл істі қолға алыпты. Әлеуметтік желіде хабарламалар жариялаған соң белгісіз біреу қоңырау шалып, іздеп жүрген адамның көршісі екенін айтыпты.
«Керек үйді тез таптық. Расымен, ол Алексей екен. Өзін кім іздеп жатқанын түсінбеді. Ал біз тосынсый жасап, қызына бейнеқоңырау жасадық. Сол кезде байланыс ұстайтын жер іздеп, үйді шыр айналдық. Қуаныштан көзімізге жас алдық. Олардың көзінде қуаныш болды, мұны сөзбен жеткізе алмаймыз», – дейді еріктілер.
Жақында Нина әкесіне келген. Ал туған күнінде Алексейге құжаттарын табыстапты. Алексей енді Қазақстан азаматы, емін-еркін қызына бара алады.
