Семей қаласының мәдениет және тілдерді дамыту бөлімінің, тұрғын үй-коммуналдық шаруашылық, сәулет және қала құрылысы бөлімдерінің, Абай облысының тарихи-мәдени мұраны қорғау орталығының қызметкерлері Семей аумағындағы тарих және мәдениет ескерткіштерінің жай-күйіне мониторинг жүргізді.
Айтолқын САМАТОВА,
«Семей таңы»
Семейде бүгінде 68 тарих және мәдениет ескерткіші тіркелген. Олардың 35-і — сәулет және қала құрылысы, 17-сі — монументалды өнер, 16-сы — тарих және археология ескерткіші. Оның 10-ы республикалық, 58-і жергілікті маңызы бар ескерткіштер қатарында.
Бейсенбі, 13 сәуір күні жоғарыда аталған мекемелердің өкілдері Семей қаласы аумағындағы тарих және мәдениет ескерткіштерінің жай-күйіне мониторинг жүргізді.
Сарапшылар барлығы оннан астам көне ескерткіштерді — Тыныбай мешітін, Екінші дүниежүзілік соғыс кезінде эвакуациялық госпитальда жарақаттан қайтыс болғандар жерленген орынды, Ямышев қақпасын, Абай ескерткішін, «Семейге 250 жыл» стелласын және өзге де нысандардың жағдайын тексерді.
– Жалпы, ескерткіштердің көпшілігі салыстырмалы түрде қанағаттанарлық жағдайда. Әуезов пен Абай ескерткіштерінің төменгі тұстары біраз жөндеуді қажет етеді. «Өлімнен де күшті» монументіне апаратын баспалдақтарда сынықтар байқалады. Сонымен қатар ауған жауынгерлеріне арналған мемориалды тақта да жаңартуды қажет етеді. Жалпы айтқанда, ескерткіштердің жағдайы жаман емес,- дейді Семей қалалық мәдениет және тілдерді дамыту бөлімінің бас маманы Айнаш Қасымбек.
Мониторинг қорытындысы бойынша мамандар жалпы қорытынды шығарып, ескерткіштерді сақтау бойынша ұсыныстар береді.
Мәдени мұраны сақтау және қорғау қала әкімдігі қызметінің басым бағыттарының бірі болғандықтан, барлық қажетті шаралар қолға алынады.
