«Семей орманы» мемлекеттік орман табиғи резерваты» мекемесінде көшет отырғызу жұмыстары басталды. Табиғи резерват мамандары тұқымбақта өсірілген өскіндерді орман алқабына егу жұмыстарына кірісті. Көшет отырғызуға резерват қызметкерлері ғана емес, жастар мен қоршаған орта табиғатына бейжай қарамаймын қала тұрғындары да атсалысуда.
Мемлекет басшысы 2020 жылғы Қазақстан халқына Жолдауында елді көгалдандыру мақсатында 5 жыл ішінде орман қорларында 2 млрд және аймақтар мен елді мекендерде 15 миллион көшет отырғызуды тапсырған болатын. ҚР Экология және табиғи ресурстар министрлігі Орман шаруашылығы және жануарлар дүниесі комитетінің барлық облыстағы мекемелерінде орман алқабын толықтыру мақсатында 2021 — 2025 жылдарға арналған кешенді жоспар жасалған. Сол жоспар аясында «Семей орманы» бес жыл ішінде 25 400 гектар жерге 119 млн 400 мың ағаш отырғызуы тиіс. Ал биылғы жоспарға сәйкес, 5 100 гектар жерге 23 миллион 90 дана көшет отырғызу жоспарланып отыр.
13 сәуір — Бүкілқазақстандық орман күні аясында БАҚ өкілдері үшін Қызыл кордон орманшылығына баспасөз туры ұйымдастырылды. Баспасөз туры барысында БАҚ өкілдері, Шәкәрім жоғарғы колледжінің студенттері және орман саласы мамандары Семей филиалының Қызыл кордон орман шаруашылығының 100-ші орамында 2 жасар қарағай көшеттерін отырғызды. Орман ортасында ұйымдастырылған іс-шарада мамандар қарағай тұқымын егіп қана қоймай, оның егілу тәртібін, қалай күтім жасалатынын түсіндірді. Мамандардың айтуынша, тұқымның дайын көшетке айналуы үшін екі жыл уақыт қажет. Көшеттерді ылғалды топыраққа отырғызу керек. Көрші тұрған екі көшеттің арасы 70– 80 сантиметр болуы тиіс және әрбір талдың түбі мығым бекітілуі қажет. Тағы бір айта кетерлігі — «Семей орманы» резерваты ағаштарды отырғызудың екі техникасын, яғни қолдан отырғызу және автоматтандырылған әдісті қатар пайдаланады екен. Өзіндік тәртіппен отырғызылатын өскендір бір – екі жылдың көлемінде биікке бойлап кетпейді. Олардың орман болып жайқалуына ондаған жылдар қажет.
— Орман алқабын толықтыру мақсатында бүгін көшет отырғызуды бастадық. Республикалық орман ағаштарын отырғызу акциясы аясында БАҚ өкілдері мен студенттерді шақырып, Қызыл кордон орманшылығында көшет отырғызудамыз. Қызыл кордон орман шаруашылығының ауданы 19 мың гектарды құрайды, оның 11 мың гектары орманды алқап. Өткен жылы 150 гектар аумаққа ағаш егілген болса, биыл ағаш отырғызу алаңы 90 гектарды құрамақ. Көшеттер Бородулиха ауданындағы орман тұқым бағында өсіріліп, осында әкелінеді. Бүгін басталған ағаш отырғызу акциясы мамыр айының алғашқы онкүндігіне дейін жалғасады.
Әлі жетілмеген көшеттер ұзақ уақыт бойы орманшылардың күтімінде, бақылауында болады, — дейді Қызыл кордан орман шаруашылығының орманшысы Нұржан Бақытбекұлы.
1997 жылы болған ірі орман өртінің салдарын жою жұмыстары әлі күнге дейін жалғасуда. «Дала өрттерін бақылау және алдын алу оңай емес. Өткен жылы өте көп өрт болды. Бақылау барысында 280 өрт тіркелді. Бірақ мемлекеттік инспекторлар оның таралуына жол бермеді. Құрғақ шөп өте оңай тұтанып, от тез таралады. Егер өрт жоғары көтерілетін болса, оны тоқтату қиын», − дейді орманшылар.
Өртенген орманды қалпына келтіру үшін ұзақ уақыт қажет. Тіпті ондаған немесе жүздеген жылдарға созылуы мүмкін. «Семей орманы» резерватындағы орман алқабы, қаз қатар сап түзеп тұрған қарағайлар — қаншама жылғы еңбектің нәтижесі.