Биыл алдағы екі айдың ішінде Семей қаласында қырыққа жуық көп қабатты үйлердің қасбеттері жөндеуден өтетін болады. Осыған байланысты қала әкімі Нұрбол Нұрсағатов мердігер ұйымдардың басшыларымен көшпелі кеңес өткізді.
Мұхтар СОВЕТЖАНОВ,
«Semeı tańy»
Қазіргі таңда 4 мердігер ұйым көп қабатты үйлердің қасбетін жаңалауды бастап кетті. Қала орталығындағы сырты ескеріп, өңі кеткен үйлер нақты белгіленіп, мердігер ұйымдарға берілген. Бұл үйлердің қазіргі көрінісі мен жөндеуден кейінгі көрінісі арнайы қағазға сызылып, қабырға сырты қандай түстерге боялатыны да анықталған.
— Үйлердің сыртын тек бояп қана қоймай, толықтай күрделі жөндеуден өткізу керек. Қазіргі таңда кейбір үйлердің сылақ қабырғалары құлап жатыр. Мердігер ұйымдарға осыған назар аударуды тапсырып отырмын. Боялған қабырғалардың түсі бір емес, бірнеше жылдар бойы сақталуы шарт,- деді қала әкімі Нұрбол Нұрсағатов.
Жөндеу жұмыстары кезінде тұрғын үйдің құлаған сылақтары ішінара қалпына келтіріледі.
Көп пәтерлі үйлердің қасбеттерін жөндеу және сырлау бойынша жоба өткен жылы қолға алынған болатын. Былтыр қаладағы 16 көп қабатты үйдің сыртына жөндеу жұмыстары жүргізіліп, қасбеттері боялды. Биылғы жоспар бойынша, үйлердің саны одан екі есеге артып отыр. Мердігерлер бекітілген үйлерді толық жөндеуден өткізіп, уақтылы аяқтауы тиіс. Қырыққа жуық үйдің қасбетін жөндеуге 220 миллион теңге қаражат бөлінген. 2023 жылы алғашында қасбеттерді жөндеу жобасына 32 көп қабатты үй енгізілді. Алайда жөнделетін үйлердің саны 40-қа дейін өсуі мүмкін.
— Биыл біз қасбеттерді жөндеу жұмыстарын жалғастырамыз. Алғашында тізімге 32 үй кірді. Бірақ мердігерлер конкурстық рәсімдерді өткізу кезінде үлкен жеңілдік жасады. Бұл жөнделетін үйлердің санын 40–қа дейін арттыруға мүмкіндік береді, — деді Семей қаласының әкімі Нұрбол Нұрсағатов.
Әкімнің айтуынша, байқау нәтижесінде 80 млн теңге үнемделген. Жалпы, биыл қасбеттерді жөндеуге қалалық бюджеттен 300 млн теңге қарастырылыпты.
Нұрбол Нұрсағатов сонымен қатар қала бойынша атқарылатын абаттандыру жұмыстары жайлы да айтып өтті. Алдағы айдың ортасынан бастап Семейде аулалар мен қоғамдық кеңістіктерді абаттандыру, сондай-ақ жолдарды орташа жөндеу жұмыстары басталады. Биыл 70 үлкен ауланы абаттандыру және ұзындығы 60 шақырым болатын 40 көшені орташа жөндеуден өткізу жоспарланған.
