Қазақтың ақиық ақыны Мұқағалидың:
Пай! Пай! Пай! Киелі неткен жер!
Батырлар дүрілдеп өткен жер,
Тұлпарлар дүбірлеп төккен тер,
Ғашықтар бір-бірін өпкен жер,
Сарылып сал-сері кеткен жер,
Бас иіп, иіскеп топырағын,
Тағзым жасамай өтпеңдер! — деген жыр жолдары дәл осы біздің Тарбағатай өңіріне арналып жа-зылғандай әсер қалдырады. “Бастаса елдің көсемі, сөйлесе сөздің шешені” дегендей талай-талай талантты ұл-қыздарымен әйгіленген Тарбағатай жері шын мәнінде Қыдыр дарып, құт қонған киелі өңір. Осы өңірдің еліміз Тәуелсіздік алғаннан бергі өсіп-өнген ұрпақтары бұл күндері оңы мен солын танып, өнер – білім жолына түсіп, талаптың тұлпарын мініп, ірі-ірі қалаларда жүр. Сондай қалалардың бірі-Семей. Семейдегі жоғары оқу орындарында тарбағатайлықтарды топ-тобымен кездестіруге болады. Оқу бітіріп, мамандық алғандардың көбі «Дипломмен – ауылға» бағдарламасын қолдай отырып, туған ауылдарына келіп, қызметке араласқан. Солардың өміршең дәстүрін енді іні-қарын-дастары жалғастыруда.
Міне, осы дәстүрді қолдау үшін 19 желтоқсан күні Тарбағатай ауданының әкімі Ділдабек Оразбаев Семей қаласының Шәкәрім атындағы мемлекеттік университетінің мәжіліс залында қаладағы жоғары оқу орындарының және колледж студенттерімен кездесу өткізді. Жастардың болашағына бағдар беретін осы маңызды басқосуға бұрын ауданымызда әр салада жемісті қызмет істеген зиялы қауым өкілдері де қатысып, өз ой-пікірлерімен бөлісті. Кездесуге қала оқу орындарынан жиыны 300-ге жуық жастар қатысты.
Жастар –жаңашылдықтың бастауы десек, қазір Елбасының салиқалы саясатының аясында жастарға арналған бірнеше жалпыұлттық бағдарламалар іске асырылуда. Бұл бағдарламалар бойынша ауылға келіп қызмет істеп жатқан жастардың қатары аз емес. Әсіресе, «Дипломмен -ауылға!», «Ауыл жастары», «Жасыл ел», «Жастар практикасы» сияқты жобалар аясында біздің жастарымыз өз мамандықтары бойынша өмірдегі өз орындарын табуда. Бүгінгі таңда жастарымыздың таңдаған мамандығы бойынша білім алып, қалаған салада еңбек етуіне мол мүмкіндіктер бар. Қоғамдағы аса маңызды мәселеге айналып отырған жастардың еңбек етуін ұйымдастыру бағытындағы мақсатты көздеген кездесуде аудан әкімі Д.Оразбаев ауданымыздың түрлі салалары бойынша қажеттілікке айналып, жетіспей жатқан салаға кадрларды тарту мақсатында студенттермен тікелей сұхбаттасуды жөн көрді.
Алдымен аудан басшысы жиналған қауым алдында ауданның экономикалық, әлеуметтік өсу деңгейі, атқарылып жатқан жұмыстар турасында жан-жақты мәлімет берді. Шындығында тарбағатайлықтардың мақтаныш етерлік табыстары көп екен. Мысалы, биылғы он бір айдың көрсеткіштері бойынша ауданымыз облыс аудандары арасында даму деңгейі жоғары бес ауданның қатарына қосылыпты.
— Материалдық өндірістің өзекті саласы болып табылатын мал шаруашылығын дамыту, оның тұқымын асылдандыру, мал бордақылау алаңдарын салу көрсеткіштері жағынан біз Қазақстан бойынша тек Балқаш ауданына ғана жол беріп отырмыз. Бірақ, өндірісті қазіргі қарқында дамыта беретін болсақ алдағы екі-үш жыл ішінде ол ауданның да жетістігін еселеуіміз ғажап емес. Тарбағатай ауданы дамудың барлық түрі бойынша Қазақстандағы ең алдыңғы қатарлы аудан болуы керек. Ол мақсатқа қол жеткізу біздің қолымыздан келеді,- деді аудан басшысы Ділдабек Тәжібайұлы.
Баяндамада сондай-ақ, аудандағы 30 мың гектар суармалы жерді тиімді пайдалану, жылыжайларды іске қосып, тамшылатып суару әдісін игеру, мал азығының сенімді қорын жасау үшін екпе шөптерді көптеп өсіру міндеттерінің де маңызды екенін атап айтты. Халықты жұмыспен қамту, шағын және орта бизнесті дамыту мақсатында да атқарылған істер аз емес екен. Мысалы, «Жұмыспен қамту-2020» бағдарламасы бойынша былтыр аудан бойынша 120 миллион теңге игерілсе, биыл ол көрсеткіш 420 миллион теңгеге өсіпті. Алдағы жылы 600 миллион теңге қаржы алу жоспарланған көрінеді. Осы бағдарлама негізінде келер жылы Ақсуат пен Ақжардан бір-бірден шағын сүт өңдеу зауытын салып, мектептер мен балалар бақшасын, ауруханаларды сапалы сүт өнімдерімен қамтамасыз етуге қадам жасалмақ. Аудан әкімі бір жылда өзімізге қажетті 500 тонна сүт өнімдерін алыс қалалардан сатып әкелетіндігімізді мысалға келтірді. 112 мың сиыр малы бар ауданда мал саууды жолға қойып, оны өңдеп, қажетке жаратудың артықшылығын талдап көрсетті. Сондай-ақ, жұмыртқаны да басқа жақтан тасымай, әр ауыл өзін- өзі қамтамасыз ету үшін де құс фермаларын ашып, мақсатты жұмыстар жобаланып отырғанын ескертті. Ауданда үш-төрт жерден қымыз өңдеу орталықтары ашылатыны, қызанақтан томат жасап, қияр тұздайтын кәсіпті жолға қою жоспарлары да кездесуге қатысып отырған ардагерлер мен болашақ мамандарды қызықтара түскендей еді.
Аудан басшысының баяндамасында жастар саясатындағы жаңа бастамалар, атқарылып жатқан игі істер, жастар үшін барлық жағдайлар жасалып жатқандығы, жұ- мысқа орналасқан жас мамандарға гранттар беріліп, жыл сайын ынталы жастардың көптеп келетіні, оларға жасалған жағдайлар егжей-тегжейлі әңгімеленді.
-Қазір ұлттық білім жүйесі жаңарып жатыр. Жас мамандардың біліміне, кәсіби шеберлігіне, бәсекеге қабілеттілігіне деген талап арта түсті. Ендігі жерде жұмысқа тек конкурспен қабылдауы мүмкін. Бәсеке деген сол. Білімді жастар-еліміздің ертеңгі болашағы, осыған сәйкес студент жастарға айтарым -сапалы білім алып, жоғары құзіретті маман ретінде ауылға келіп, туған жерлеріңізді өркендетуге үлес қосыңыздар, — деді аудан басшысы.
Кездесуде аудан әкіміне ақсақалдар да, студент жастар да өздерін толғандырып жүрген мәселелер жөнінде сауалдар қойды. Сұрақтардың мазмұны ауыл мәдениеті, экономикасы, жол мәселесі, жұмыссыздықпен күрес, жұмысқа орналасу, ауданның болашағы туралы болды. Ділдабек Тәжібайұлы әрбір сұраққа нақты жауап бере отырып, көптеген мәселелердің орынды қозғалғанын, ауданның әлеуметтік экономикалық әлеуетін көтеруде мұнда айтылған құнды пікірлердің алдағы уақытта бағдаршам ретінде ерекше мәні болатынын айтты. Кездесу соңында Семейдің жоғары оқу орындарында білім алып жүрген бір топ студентке оқудағы, қоғамдық жұмыстардағы белсенділігі үшін аудан әкімі Алғыс хат тапсырды.
Бұл күні кездесуге қатысқандар тағы бір қуанышты оқиғаның куәсі болды. Аудан әкімі Д.Оразбаев белгілі жазушы, Абайтанушы, «Құрмет» орденінің иегері, жерлесіміз Төкен Ибрагимовке «Тарбағатай ауданының Құрметті азаматы» атағы берілгенін мәлімдеп, салтанатты түрде төсбелгі тапсырды, иығына шапан жапты. Кездесу тарбағатайлық өнерпаздардың шағын концертіне ұласты.
Ш. КӨПШІКБАЕВА.
Суретті түсірген Х.СӘТИЕВ.
