Semeytany.kz — Дональд Трамп журналистерге Қытаймен арадағы сауда дауы «толыққанды соғысқа» айналғанын мәлімдеді, деп Stan.kz порталына сілтеме жасап хабарлайды.
Оның айтуынша, айдың соңында Си Цзиньпинмен жоспарланған кездесуге дейін-ақ екі ел арасындағы кикілжің ушығып тұр. «Біз қазірдің өзінде соғыс ішіндеміз», – деді Трамп журналист сұрағына жауап беріп.
Трамп Қытайға қатысты жаңа кедендік баждарды да тілге тиек етті: «100% баж салығы бар. Егер баж салығы болмаса, біз өзімізді ештеңеге жарамайтын ел ретінде көрсетер едік», – деді ол. Сонымен қатар, Қытайдың АҚШ-тан соя сатып алуды қысқартқанына жауап ретінде Қытайдан тағамдық май импортына шектеу қою керек екенін айтты. АҚШ Соя өндірушілер қауымдастығы Қытайды америкалық сояның ең ірі тұтынушысы болғанын еске салды.
Соңғы күндері жағдайды шиеленістірген жайттардың бірі – Қытайдың сирек кездесетін минералдар экспортына шектеу енгізуі. Бұл шикізат АҚШ-тың электроника, өнеркәсіп және әскери техника өндірісі үшін маңызды саналады. Трамп «қарашаның 1-інен бастап Қытайға 100% кедендік салық салынады» деп мәлімдеді. Қазір Қытайдан келетін тауарларға 30% тариф қолданылады деген дерек те келтірілді.
Берілген мәліметтерге сай, 2020–2023 жылдары сирек жер металдарының 70%-ын АҚШ Қытайдан импорттаған. Ал Трамп пен Си Цзиньпиннің келесі кездесуі 31 қазанда Сеулде өтетін Азия–Тынық мұхиты экономикалық форумының аясында жоспарланып отыр.
