Semeytany.kz — Семей қаласындағы «Арена» спорт кешенінде 14-21 қазан аралығында ел біріншілігі өтіп жатыр. Додаға Қазақстанның барлық өңірінен 400-ге жуық спортшы келді.
Чемпионат биыл World Boxing ұйымы бекіткен жаңа салмақ дәрежелері бойынша өтуде. Жарыс қорытындысында ең үздік боксшылар ұлттық құрама сапына іріктеліп, алдағы халықаралық және әлемдік сындарда ел намысын қорғайды. Ашылу салтанатына Абай облысының әкімі Берік Уәли, Қазақстан бокс федерациясының бас хатшысы Мерей Ақшалов және танымал спортшылар қатысты.
Аймақ басшысы сөзінде бұл дода Семейге 29 жылдан кейін қайта оралғанын атап, спортшыларға сәттілік тіледі. Биыл өңір спортшыларының жетістігі де ерекше: 2025 жылы Абай облысының 451 спортшысы ұлттық құрамаға енді, жыл басынан бері республикалық жарыстарда 1232 (376 алтын, 337 күміс, 519 қола), халықаралық турнирлерде 182 (56 алтын, 51 күміс, 75 қола) медаль иеленді. Жастар арасындағы Азия біріншілігінде жерлестеріміз Жанель Имантаева мен Ақнұр Тұрсынғали жеңімпаз атанды.
Біріншілік «Арена» спорт кешенінде ұйымдастырылған. Мұнда жарыстың барлық кезеңдері өтіп, финалдық бәсекелер 21 қазанда жоспарланған.
Семейде спорт инфрақұрылымын жаңғырту жұмыстары да қарқынды. «Абайға құрмет» акциясы аясында алдағы үш жылда бірқатар нысан салынып, жаңартылады: «KAZ Minerals» компаниясымен меморандум бойынша 25 мың көрерменге лайық стадион бой көтермек; Павлодар облысы Үстел теннисі орталығын, Ақтөбе облысы Жекпе-жек сарайын сый ретінде салып береді; сондай-ақ Абай облысы әкімдігі мен «Самұрық-Қазына» қорының әріптестігі негізінде Семейде Дене шынықтыру-сауықтыру кешенінің құрылысы басталды.
