Semeytany.kz — Мәжіліс депутаты Нартай Сәрсенғалиев елдегі әскери ортада қайғылы жағдайлардың жиілеуіне назар аударып, ішкі істер министрі Ержан Сәденовтен бұл мәселені жүйелі шешетін нақты тетік ұсынуды талап етті.
Депутаттың айтуынша, кейінгі үш жылда 270 сарбаз қаза тапқан. Биыл қыркүйекте Алматыда әскерге шақырылғанына бір апта өтпей жатып бір азамат көз жұмды. Одан бөлек, оқу-жаттығу кезінде оқ тиіп опат болған және жұмбақ жағдайда қайтыс болған жайттар тіркелген. «Әлеуметтік желіде марқұмның денесін әкелгенде ананың әскерилердің жағасынан алғанын көрдік», — деді Сәрсенғалиев.
Ол «Құқықбұзушылық профилактикасы туралы» жаңа заң жобасы әскердегі заңсыздықтарды, Уставқа қарсы әрекеттерді шынайы жоятын механизмдермен толықты ма, әлде 17-баптағы стандартпен шектеле ме?» деп сұрады.
Ержан Сәденов: «Толыққанды бәрін шештік деп айта алмаймын. Бұл — бірінші отырыс. Ұсыныстар болса, қарауға дайынбыз. Жалпы мәселе Қорғаныс министрлігімен бірге қаралды», — деп жауап берді. Министрлік тарапынан ұсыныстар қабылданып, тиісті нормаларды нақтылау жұмыстары жалғасатыны айтылды.
Кілт сөздер: Нартай Сәрсенғалиев, Ержан Сәденов, әскердегі өлім, Құқықбұзушылық профилактикасы туралы заң, ІІМ.
