Қазақстаннан Қытайға тартылатын үшінші темір жол желісі Бақты — Аягөз тармағының құрылысы басталды. Аягөз қаласының іргесінде салтанатты шара өтіп, ҚР Премьер-Министрі Әлихан Смайылов телекөпір арқылы құрылыс жобасын ресми түрде іске қосты.
Қуаныш ЖОЛЫМБЕТ,
«Semeı tańy»
Тарихи маңыздылығы зор іс-шараға Абай облысының әкімі Нұрлан Ұранхаев, «ҚТЖ» ҰК» АҚ мен «Самұрық-Қазына» АҚ, Көлік министрлігі өкілдері мен ардагерлер қатысты.
Телекөпір барысында ҚР Премьер-Министрі еліміздің темір жол саласындағы оң өзгерістер мен Президент тапсырмасы аясында жүзеге асырылып жатқан істерге тоқталып, жаңа телімнің тиімділігі жайында айтып өтті.
— Еліміз үшін кезекті маңызды іс-шараға – Бақты — Аягөз темір жол желісі құрылысының басталуына қатысып отырмыз. Бұл жоба Президент Қасым-Жомарт Тоқаевтың тапсырмасы бойынша қолға алынды. Темір жол құрылысы — ел экономикасының әлеуетін арттыру құралдарының бірі. Өткен жылы темір жолдармен тәуелсіз Қазақстанның 30 жылындағы ең жоғары жүк көлемі тасымалданып, 245 млрд тонна километрді құрады. Мұндай жоғары қарқын, геосаяси жағдайларға және инфрақұрылымдық шектеулерге қарамастан, биыл да сақталып отыр. Соңғы жылдары контейнерлік транзиттік тасымал көлемі едәуір өсіп келеді. Транзиттік дәліздер кеңеюде. Транскаспий халықаралық көлік бағыты солтүстік-оңтүстік, оңтүстік дәліздері айрықша маңызға ие болып отыр. Қазіргі таңда өткізу мүмкіндігі мен инфрақұрылымдық қуат өз шегіне жетті, — деп атап өтті Үкімет басшысы.
Әлихан Асханұлы сондай-ақ темір жол саласында бірқатар инфрақұрылымдық жобалар жоспарланып отырғанын, көптеген жаңа жобалар іске асырылып жатқанын да жеткізді.
— Міне, бүгін ірі жобалардың бірі Бақты — Аягөз темір жол құрылысын бастағалы отырмыз. 2033 жылға қарай Қытай бағытында қосымша 20 млн тоннаға дейін жүк тасымалданады деп жоспарлануда. Бұл жобаның арқасында жүк тасымалының бір бөлігі Бақты — Аягөз темір жол желісіне және Бақты — Шәуешек халықаралық шекара бекетіне бағытталатын болады. Жаңа желі, бір жағынан, Ресей мен Еуропа елдерінің, екінші жағынан, Қытай мен Азия, Тынық мұхиты елдерінің арасында транзиттік жүктердің өтуін айтарлықтай ұлғайтады деп болжануда. Магистраль құрылысы 1700-ден астам адамды жұмыс орындарымен қамтитын болады. Жүктерді түсіру-тиеу бекеттерін ашу да жаңа жұмыс орындарын құруға мүмкіндік береді. Мұның барлығы Абай облысының ғана емес, бүкіл еліміздің экономикасына оң әсерін тигізеді. Бұл жоба Қазақстан темір жол желісінің әлемдік көлік жүйесіне ықпалдасуын кеңейтеді, — деді Премьер-Министр.
Осыдан соң сөз алған «ҚТЖ» ҰК» АҚ Басқарма төрағасы Нұрлан Сауранбаев Президент Қасым-Жомарт Кемелұлы Тоқаевтың тапсырмасы бойынша Бақты — Аягөз темір жол телімінің құрылысын бастауға Премьер-Министрден ресми түрде рұқсат сұрады. Осылайша, тарихи сәт — жаңа темір жолдың алғашқы рельс буынын төсеу рәсіміне кезек берілді. Оған ұлттық компания басшылығы, Абай облысының әкімі Нұрлан Телманұлы мен сала ардагерлері қатысты.
Бақты — Аягөз темір жол желісі Қазақстан мен Қытай арасындағы өткізу қабілетін 28 млн-нан 48 млн тоннаға дейін ұлғайтуға, оңтүстіктегі өткізу бекеттеріндегі кептелістерді жоюға және қосымша транзит көлемін тартуға мүмкіндік береді. Темір жол құрылысы 2027 жылы аяқталып, пайдалануға беріледі деп жоспарлануда.
Жаңа телімнің ұзындығы 272 шақырымды құрайтын болады. Құрылыс барысында 11 станция, 47 көпір, 23 темір жол және 8 автомобиль өткелі, 5 жаяу жүргіншілер көпірі, 16 бақылау құрылыстары салынады деп күтілуде. Ең маңыздысы, бұл темір жол Аягөз, Үржар және жаңадан ашылатын Мақаншы ауданының да әлеуетін айтарықтай арттырмақ.
