2013 жылдың шілде айының 26 күні белгілі қаламгер Әди Шәріповтің зайыбы Клара Мыңжасарова бастаған делегация киелі Абай жеріне арнайы келген болатын. Ондағы мақсаттары Ұлы Абайдың, шежірелі Шәкәрімнің, дана Мұхтардың рухына тағзым ету, Семейдің облыстық тарихи-өлкетану мұражайының Абай ауданындағы филиалына Ә.Шәріповтің кітаптарын табыс ету және өзі туып өскен үйді көру еді.
{jcomments on}Делегацияны аудандық мәслихат хатшысы Төлеубек Аманғазы мен Абай ауданы әкімінің орынбасары Ерлан Лдибаев арнайы қарсы алды. Делегация құрамында Л.Гумилев атындағы Еуразия ұлттық университетінің профессоры С.Негимов, Алматы әдебиет және өнер институтының профессоры Г.Орда, Қазақ мемлекеттік қыздар университетінің профессоры Р.Зәйкеновалар бар болатын. Қонақтарды аудан басшылары қарсы алғаннан кейін, аудандық мәслихат хатшысы Т.Аманғазы маған телефонмен қоңырау шалып, жасы 90-ға келген соғыс ардагері Жағыпар Жүнісжанұлы ақсақалдан Кеңес үкіметі кезінде Абай ауданының екінші басшысы болған Мыңжасаровтар қай үйде тұрғанын біліп беруді өтінді.
Мен дереу Жағыпар ақсақалға қоңырау шалып, осы тарихи үйдің қай жерде орналасқанын сұрадым. Сөйтсем, әлгі үй күнде өзім өтіп жүрген, күнде көріп жүрген балабақшаның қасындағы 3-4 жапсарлас үйдің біріншісі екен. Онда қазір зейнеткер Қайырбек Ғабдуллин мен Алтын Шәкүріковалар тұратын көрінеді. Жапсарлас бұл үйлер өткен ғасырдың 30 жылдары аудан басшыларына арналып саман кірпіштен салын-ған екен. Соның бірінде 1945 жылдары аудандық Кеңес атқару комитетінің төрағасы қызметін атқарған Жағыпар Мыңжасаров тұрып, Ұлы Абайдың туғанына 100 жыл толуына орай өткізілген ұлан-асыр тойда заңғар жазушы Мұхтар Әуезов, атақты палуан Қажымұқан Мұңайтпасов, ғылым докторы Есмағанбет Ысмайлов, жазушы Әди Шәріпов бастаған белгілі тұлғаларды үйінде қонақ қылып күткен көрінеді.
Алматыдан арнайы келе жатқан Клара Мыңжасарова мінген көлік сол үйдің тұ-сынан өткенде, мынау біздің балалық шағымыз өт-кен үй деп, лезде тани кетіпті. Үйдің ішіне кірген Клара апай көзіне жас алып:
— Бұл үйде менің балалық шағым өтті. Тіпті бөлмелердің орналасуы да, ағаш едендер де сол қалпында екен,- деп көңіліндегі қуанышын жасыра алмады. — Біз осы үйде тұрғанда, әкем Әди Шәріповпен жиі араласып тұратын. Ке-йіннен тағдырдың жазуымен Әдекеңнің зайыбы қайтыс болғаннан кейін, мен ол кісіге тұрмысқа шықтым. Мен ол кісіні өз қолымнан арулап жөнелттім,- деп Клара апай өз тебіренісін жасырмады.
Клара Мыңжасарова Абай еліне табан тіреген сол сапарында үй иелері Қайырбек пен Алтын сыйлы қонақтарға бас тартып, жандары қалмай дастар-қандарынан дәм татырыпты.
Қарауылдың қақ ортасында орын тепкен, іргетасы шөге бастаған осынау жатаған үй, осылайша, тарих бетінен орын алды. Осылайша, Алматыдан келген қонақтар Қарауылдағы мұражайға да бас сұғып, жазушы Әди Шәріповтің туындыларын тапсырып, тарихтың бір парақ бетін ашқандай болып қоштасты.
Малгаждар ЖҮНІСЖАНОВ,
Семейдің облыстық тарихи-өлкетану мұражайы Абай
ауданындағы филиалының меңгерушісі.
