Semeytany.kz — Абай облысында тұмау және жедел респираторлық вирустық инфекциялар бойынша эпидемиологиялық жағдай тұрақты бақылауда тұр. Бұл мәселе облыс әкімі Берік Уәлидің төрағалығымен өткен кеңейтілген аппараттық кеңесте қаралды. Жиынға облыстық басқарма басшылары мен өңірлік департамент жетекшілері қатысып, аудан және қала әкімдері онлайн режимде қосылды.
Кеңесте күн тәртібіндегі мәселелер бойынша санитариялық-эпидемиологиялық бақылау департаментінің басшысы Нұржан Ноғайбаев, денсаулық сақтау басқармасының басшысы Талғат Молдабеков, жолаушылар көлігі және автомобиль жолдары басқармасының басшысы Мерей Байырхан, «ҚазАвтоЖол» ҰК» АҚ облыстық филиалының басшысы Айбек Әнуарбеков және «Жол активтері сапасының ұлттық орталығы» РМК облыстық филиалының директоры Мейіржан Бауыржанұлы баяндама жасады.
Денсаулық сақтау саласы өкілдерінің айтуынша, облыста тұмау және ЖРВИ бойынша ахуал тұрақты бақылауда. Жергілікті бюджет есебінен халықтың осал және тәуекел топтарына 60 мың доза вакцина сатып алынып, 60 701 адамға екпе егілген. Медициналық ұйымдарда түсіндіру жұмыстары жүргізіліп, ұжымдық иммунитет қалыптастырудың маңызы тұрғындарға үнемі түсіндірілуде. Қазіргі таңда өңірде 246 инфекциялық төсек-орын дайындалған.
Медициналық мекемелер қажетті дәрі-дәрмекпен және медициналық жабдықтармен қамтамасыз етілген. Барлық алғашқы медициналық-санитариялық көмек ұйымдарында 110 сүзгі кабинеті, 40 жедел жәрдем кабинеті жұмыс істеп тұр. Қаладағы 6 стационарда және барлық аудандық ауруханаларда оқшаулау бөлмелері ұйымдастырылған. Эпидемиологиялық жағдай Денсаулық сақтау министрлігімен бірлесіп күн сайын мониторингке алынып отыр.
Жиын барысында аймақ басшысы желтоқсан айының ортасына қарай тұмау және ЖРВИ бойынша сырқаттанушылық өсімі күтілетінін атап өтіп, облыс әкімінің бірінші орынбасары Ербол Садыр мен денсаулық сақтау басқармасының басшысы Талғат Молдабековке бірқатар тапсырма жүктеді. Атап айтқанда, барлық медициналық, білім беру және әлеуметтік мекемелерде бетперде режимін сақтауды қамтамасыз ету, инфекциялық төсек-орындарға күнделікті мониторинг жүргізу және қажет болған жағдайда қосымша резервтік орындар дайындау тапсырылды.
Сонымен қатар, денсаулық сақтау басқармасына аудан және қала әкімдерімен бірлесіп, тұмауға қарсы екпе мен алдын алу шаралары бойынша түсіндіру жұмыстарын күшейту жүктелді. Кеңес барысында 2025 жылға арналған жол салу және жөндеу жобаларының іске асырылу барысы да қаралып, жауапты мекемелерге нақты міндеттер қойылды.
