Semeytany.kz – Семейдегі Абай атындағы қазақ музыкалық драма театрында Шымкент қаласының мәдениет күндері аясында «Шежірелі Шымкенттен – Ұлы Абай еліне» атты гала-концерт ұйымдастырылды. Екі күнге созылған мәдени бағдарлама ұлы ақынның 180 жылдығына орайластырылды.
Концерт басталар алдында Абай облысының әкімі Берік Уәли мен Шымкент қаласы әкімінің орынбасары Сәрсен Құранбек жиналған жұртшылықты құттықтап, екі өңірдің мәдени байланысының маңызын атап өтті. Аймақ басшысы оңтүстіктен келген 200-ге жуық өнерпаздан құралған делегацияға, сондай-ақ қонақтарды жіберген Шымкент қаласының әкімі Ғабит Сыздықбековке ерекше алғыс білдірді.
Берік Уәли өз сөзінде Мемлекет басшысы Қасым-Жомарт Тоқаевтың тарихи шешімімен Абай облысының қайта құрылуы өңірдің даму қарқынын үдеткенін, соның нәтижесінде республиканың түрлі өңірлерінен өнер ұжымдары келіп, шығармашылығын жұртшылыққа кеңінен таныстырып жатқанын айтты. Оның айтуынша, Абайдың 180 жылдығына байланысты бұл – Семейге келіп жатқан төртінші өңірдің делегациясы. Бұған дейін бірнеше облыстың өнерпаздары концерттер өткізіп, ауыл шаруашылығы жәрмеңкелері ұйымдастырылып, өңірлер арасындағы ынтымақтастық тереңдеп келеді.
Сондай-ақ ол қазан айында Шымкент қаласында өткен Абай облысының мәдени күндерін еске алып, сол сапар барысында Абай саябағында Тұрағұл Абайұлына ескерткіш тақта орнатылғанын, Шымкент көрермендерінің Абай театры сахналаған «Абай айтқан Еңлік – Кебек» қойылымын тамашалағанын атап өтті. «Абайға құрмет» акциясын алғаш қолдаған өңірдің бірі ретінде Шымкенттің Семейге шығармашылық орталығы мен мәдениет үйін салып беруге ниет білдіруі де екі тараптың берік серіктестігінің айғағы екені айтылды.
Шымкент қаласы әкімінің орынбасары Сәрсен Құранбек те сөз алып, Абайдың 180 жылдығы аясында шымкенттік өнерпаздардың осы өңірге төртінші рет келіп отырғанын жеткізді. Ол бұған дейін тамыз айындағы мерейтойлық іс-шаралар, қыркүйек айында Жұмат Шанин атындағы Шымкент қалалық академиялық драма театрының Семей сахнасында қойған «Желсіз түнде жарық ай» инценировкасымен, сондай-ақ шымкенттік музейлер мен кітапханалардың ұйымдастырған көрмелерімен қалалықтар жақсы таныс екенін еске салды. Бұл жолы да Шымкенттен Абайдың 180 жылдығына символикалық мәні бар 180 өнерпаз келгенін атап өтті.
Гала-концертте Қазақ ұлт-аспаптар оркестрі, Шымкент циркінің эстрадалық оркестрі, «Қаған» этно-фольклорлық ансамблі, «Қазына» халық би ансамблі, «Өркен» тобы, дәстүрлі әншілер және танымал эстрада әншілері Ғазизхан Шекербеков, Бағылан Жолдасов пен Бота Әлімхан өнер көрсетті. Көрермендерге Шәмші Қалдаяқовтың әндері мен Сүгірдің күйлері орындалып, ұлттық өнердің озық үлгілері ұсынылды.
Гала-концертке дейін Абай атындағы қазақ музыкалық драма театры ғимаратында «Көне қала – Шымкент» тақырыптық көрмесі ашылды. Экспозиция «Көне Шымкент тарихы», «Этнография» және тарихи фотосуреттер топтамасы сияқты бірнеше бөлімнен тұрды. Көрме барысында 2200 жылдық тарихы бар шаһардың көне дәуірден бүгінге дейінгі мәдени дамуы, археологиялық мұралары мен рухани құндылықтары жайлы тың деректер ұсынылып, семейлік көрермендерге Шымкент тарихына жаңа қырынан көз жүгіртуге мүмкіндік туды.
