Semeytany.kz – Абай облысының әкімі Берік Уәлидің төрағалығымен өткен кеңесте өңірге инвестиция тарту мәселесі талқыланды. Жиын барысында аудан-қалаларда бұл бағыттағы жұмыстардың тиісті деңгейде жүргізілмей отырғаны айтылып, нақты тапсырмалар берілді.
Облыстық Кәсіпкерлік және индустриялық-инновациялық даму басқармасының басшысы Айбек Рахимбековтің мәліметінше, қазіргі уақытта жалпы құны 2,8 трлн теңге болатын 39 жоба ұлттық цифрлық инвестициялық платформаға енгізілген. Бұл жобалар 9 мыңнан астам жаңа жұмыс орнын ашуға мүмкіндік береді. Биыл соның 9 жобасын іске қосу жоспарланып отыр, оның 5-еуі Семей қаласында. Жалпы құны – 31 млрд теңге, 752 жұмыс орны ашылады деп күтілуде.
Сонымен қатар жалпы құны 388,2 млрд теңгені құрайтын, 4 мыңнан астам жұмыс орнын қамтитын 24 жобадан тұратын өңірлік инвестициялық пул жасақталған. Оның ішінен келесі жылы 5 жоба іске қосылады деп жоспарланған. Бұл жобалардың құны – 11,9 млрд теңге, 222 адам жұмыспен қамтылмақ.
Дегенмен кейбір аудандарда инвестиция тарту бойынша жүйелі жұмыс байқалмайтынын атап өткен аймақ басшысы:
– Бұл – Мемлекет басшысының тікелей бақылауындағы мәселе. Сондықтан әр аудан мен қаланың бұл бағыттағы жұмысы нақты индикаторлар бойынша ай сайын бағаланып, тұрақты бақылауда болады, – деді.
