Semeytany.kz — Семей қаласы әкімінің міндетін атқарушы Бекжан Бапышев көшпелі жиын өткізіп, Шығыс және Водный кенттерінде салынып жатқан мектептердің инженерлік желілерінің барысын тексерді.
Шығыс кентіндегі 300 орындық мектепке электрмен жабдықтау желісі 5 635 метр, байланыс желілері 2 864 метр, су құбыры 2 507 метр болып тартылуда. Бұл нысанның құрылысы биыл басталған.
Водный кентінде 600 орындық жаңа үлгідегі үш қабатты №52 мектептің 10 кВ кернеулі 5 000 метр электр кабелі төселіп жатыр. Білім ордасы 2025–2026 оқу жылында пайдалануға берілмек. Бұл – «Келешек мектептері» жобасы аясында Абай облысындағы үшінші, Семей қаласындағы екінші мектеп.
Сапар барысында Бекжан Бапышев №40 орта мектебіндегі жұмыстарды да көріп, оқушылардың қауіпсіздігі үшін мектеп аумағын қоршау ісін жеделдетуді тапсырды. Қазіргі таңда қоршау жұмыстары жалғасуда.
«Балалардың қауіпсіздігі мен сапалы білім алуы – біздің басты міндетіміз. Құрылысы жүріп жатқан әрбір мектеп – қаланың болашағына қосылған үлкен үлес», – деді Бекжан Бапышев. Уақытылы әрі сапалы салынған жаңа білім нысандары аймақтың әлеуметтік дамуына серпін беріп, балалардың жайлы ортада жан-жақты қалыптасуына мүмкіндік жасайды.
