Semeytany.kz – Бүгін қаладағы «Өлімнен де күшті» монументіне гүл шоқтары қойылып, ядролық сынақ құрбандары бір минут үнсіздікпен еске алынды. Іс-шараға «Невада–Семей» халықаралық антиядролық қозғалысының белсенділері, жергілікті атқарушы орган өкілдері, қоғам қайраткерлері мен қала тұрғындары қатысты.
Шараға Абай облысы әкімінің орынбасары Мейірлан Раханов және қала әкімінің орынбасары Қуаныш Әбілдаев келіп, Семей өңірінің тарихындағы қасіретті кезеңді ұмытпау – болашақ ұрпақ алдындағы жауапкершілік екенін атап өтті.
«Өлімнен де күшті» монументі – ядролық сынақтарға қарсы күрестің символы. Семей полигоны осыдан 34 жыл бұрын, 1991 жылғы 29 тамызда жабылды. Қазақстан әлемде алғашқылардың бірі болып ядролық қарудан түбегейлі бас тартып, бейбітшілік жолын таңдады.
Бүгінгі тағзым – сол тарихи шешімнің маңызын еске салу және ядросыз әлем идеясын нығайтуға бағытталған азаматтық үн қосу.
