Semeytany.kz — Водный кентінде «Келешек мектептері» ұлттық жобасы аясында 600 орындық жаңа мектеп пайдалануға берілді. Ашылу рәсіміне Абай облысының әкімі Берік Уәли мен Қазақстанның Еңбек Ері, ұлағатты ұстаз Алма Шүкіжанова қатысып, ұстаздар қауымы мен ата-аналарды жаңа оқу жылымен құттықтады.
Жаңа білім ошағы — Семей қаласындағы аталған жоба бойынша іске қосылған екінші, ал өңір бойынша үшінші мектеп. Үш қабатты ғимаратта 28 оқу кабинеті, физика, химия, биология, робототехника, графика және модельдеу кабинеттері, ағаш-металл өңдеу, тігін және кулинария шеберханалары жасақталған. Сонымен қатар 7 зертхана, кітапхана, оқу залы мен коворкинг аймақтары, акт залы мен асхана бар. Аулада футбол, волейбол, баскетбол алаңдары, жүгіру жолақтары және спорт залы қарастырылған.
Мектеп бір ауысымда, мемлекеттік тілде білім береді. 1–11 сынып аралығында 22 сынып-комплект және 1 мектепалды даярлық сыныбы ашылады. Облыс әкімі білім беру сапасын көтеруге бағытталған бұл нысанның өңір жастарына қолайлы әрі қауіпсіз орта қалыптастыратынын атап өтті.
Салтанаттан кейін аймақ басшысы сыныптарды, асхана мен спорт залды аралап, оқушылар және мұғалімдермен әңгімелесті. Водный кентінің тұрғыны Совет Тоғызбаев жергілікті халықтың көп жылдан бергі тілегі орындалғанын айтып, алғысын білдірді.
Өңірдегі білім инфрақұрылымын жаңарту жалғасуда. «Келешек мектептері» аясында қазір Аягөз қаласында 600 орындық мектептің құрылысы жүріп жатыр, нысан 2-тоқсанда пайдалануға беріледі. Семейдің Шығыс кентінде 300 орындық мектеп салынуда. Жалпы облыстағы 8200 орын тапшылығының 31 пайызы осы жобамен салынып жатқан 5 мектеп есебінен жабылады. Қалған тапшылықты жою үшін республикалық бюджеттен алдағы үш жылда 11 мектеп салу жоспарланған.
Апатты мектептер мәселесі де кезең-кезеңімен шешілуде: Жарма ауданы Суықбұлақ ауылында 100 орындық жаңа мектептің құрылысы басталды, Ақсуат ауданы Екпін ауылында 300 орындық мектептің құрылысы қолға алынады, Семейдегі №11 мектептің орнына жаңа ғимарат салу үшін құжат әзірленіп жатыр.
Қазір Абай облысында 304 мектеп бар, онда 101 мыңнан астам оқушы білім алады. 12 мыңнан астам педагог еңбек етсе, биыл 10 мыңнан аса бүлдіршін алғаш рет мектеп табалдырығын аттайды.
