Semeytany.kz – Абай облысының әкімі Берік Уәли Жаңасемей ауданы Приречное ауылдық округінде орналасқан «Агрофирма Приречное» ЖШС-нің жұмысымен танысты.
Агрофирма 1993 жылдан бері мал және өсімдік шаруашылығын қатар дамытып келеді. Қожалықта 3 мыңнан астам ірі қара бар: қазақтың ақбас сиыры, әулиекөл тұқымы және тауарлы сиырлар өсіріледі. Кәсіпорында 110 адам тұрақты жұмыспен қамтылған. Шаруашылықтың егістік алқабы 6 793 гектарды құрайды, оның 1 787 гектарына биыл картоп, көкөніс және мал азығына қажетті дақылдар егілген. Өнімдер сыйымдылығы 14 мың тонна болатын жеті қоймада сақталады.
Суармалы егіншілік те жүйелі жолға қойылған: қожалықта «Фрегат», «Valley», «Reinke», «Zimmatic» маркалы 36 заманауи суару қондырғысы бар. Биыл Солтүстік Қазақстан тәжірибесіне сүйеніп, қосымша 600 гектарға суару жүйесі енгізілді. Аймақ басшысы жайылымдық жерлерді, картоп, сәбіз, сарымсақ, жүгері, қырыққабат өсірілген алқаптарды, көкөніс қоймасын және автопаркті аралап көрді.
«Өңірдегі ірі ауыл шаруашылығы құрылымдарының бірі «Агрофирма Приречное» өрістен дүкен сөресіне дейінгі қағидатты жүзеге асырып отыр. Президент айтқан азық-түлік белдеуін қалыптастырып, тұрақтандыру қоры арқылы Семейді толық қамтамасыз етіп келеді. Осындай үлгілі шаруашылықтардың тәжірибесін өңірдегі басқа қожалықтарға да енгізуіміз қажет», – деді Берік Уәли.
Шаруашылық бірнеше жылдан бері облыстық тұрақтандыру қорын көкөніспен қамтамасыз етіп келеді. «Сәбіз, сарымсақ, қырыққабат, картоп өнімдерін тұрақтандыру қорына жеткіземіз. Биыл шығым жақсы. Көкөністі қазан айының соңына дейін жинап бітіріп, қарашадан мамырға дейін дүкендерге қолжетімді бағамен үздіксіз жеткіземіз», – деді «Агрофирма Приречное» ЖШС бас директоры Мұхит Тұмабаев.
Алдағы жоспар да ауқымды: шаруашылық 5 мың басқа арналған бордақылау алаңын салмақ. Облыс әкімі құрылыс алаңына барып, нысанның алғашқы қазығын қақты. Ағайынды Мұқашевтердің айтуынша, жалпы құны 4 млрд теңгені құрайтын жоба келесі жылы аяқталады. Бұл кешен 2026 жылы пайдалануға берілетін ірі ет комбинатына шикізат базасын қалыптастыруға бағытталған.
